ҚР Бош Вазири Бақитжан Сағинтаев ва ҚР Президенти маъмурияти раҳбари Адилбек Жақсибеков хизмат сафари билан Туркистон шаҳрига борди. 

Туркистон вилояти раҳбари Жансейит Туймебаев уларни шаҳарнинг минтақа маркази сифатидаги тараққиёт режаси билан таништирди. Чунончи, янги маъмурий-тадбиркорлик марказни ривожлантириш лойиҳаси, қурилиш инфратузилмаларини янада жонлантириш ишлари муҳокама қилинди.

– Туркистон шаҳрининг шимолий қисмидан янги шаҳарча барпо этиш учун 670 гектар ер ажратилди. Унда маъмурий-тадбиркорлик марказининг умумий ҳудуди 170 гектар майдонни ташкил этади. Унинг 300 гектарига кўп қаватли уй-жойлар қурилиб, шаҳарчада 65 мингга яқин киши истиқомат қилади. Унда вилоят ҳокимлиги, ҳудудий маҳкамалар, ҳуқуқни ҳимоя қилиш органларининг куч тузилмалари, Маданият уйлари, кўргазма марказлари, мактаб, хиёбон, истироҳат боғлари барпо этилади, – деди минтақа раҳбари.

Шу билан бирга, Ж. Туймебаев “Кўҳна Туркистон” тарихий қисмини янгилаш лойиҳасининг ғоявий моҳиятига тўхталди. Шунингдек, туркийзабон мамлакатлар томонидан сармоя жалб этиш масаласи билан қатор маҳаллий ёки хорижий сармоядорларни жалб этиш масалалари ҳам тилга олинди.