Туркистон шаҳар ҳокимлигининг улкан мажлислар залида ўтган вилоят маслаҳатининг навбатдаги йигирма олтинчи сессиясини вилоят ҳокими Ж. Туймебаев «тарихий сессия» деб таърифлади.

– Мамлакатимиз пойтахти – Астананинг йигирма йиллиги арафасида Элбошимиз Н. Назарбаевнинг 19 июндаги фармонига мувофиқ Туркистон вилоят маслаҳатининг сессияси кўҳна Туркистонда – мамлакатимизнинг маънавий марказида ўтмоқда. Биз бирлик, тотувлик, ҳамжиҳатликка асосланган ҳолда келажакда ҳам улуғ ишларни якдиллик билан амалга ошириб, Элбошимизнинг ишончини оқлаймиз, – деди Ж. Туймебаев. 

Депутат Б. Мусабеков раислигида ўтган сессияда эллик депутатдан қирқ олти нафари иштирок этди. Кун тартибидаги олтита масала кўпчилик овоз билан тасдиғини топгач, вилоят ҳокими Ж. Туймебаев, маслаҳат котиби Қ. Балабиев «Астанага – 20 йил» медалини депутатларга тақдим этдилар. Мукофотланганлар орасида Туркистон шаҳридан сайланган депутат З. Чолдонов ҳамда Сайрам туманидан сайланган депутат 

Б. Нишонқуловлар ҳам бор. Шунингдек, бир гуруҳ жамоат бирлашмалари раҳбарлари, меҳнат фахрийлари ҳам вилоят маслаҳатининг Фахрий ёрлиғи билан тақдирландилар. Мукофотланганлар орасида Шимкент ва Туркистоннинг Эски Иқонидан меҳнат фахрийлари Т. Лесбекқизи, ҳамда Н. Мубораковлар бор. 

Сессия ишини якунлар экан, вилоят ҳокими томири бир туркий халқлар бирдамлиги Туркистон шаҳри мисолида намоён этилиши лозимлигини таъкидлади.