Ушбу ҳафтада жамоаларимиз Чемпионлар лигаси ҳамда Европа лигаси иккинчи босқич саралаш ўйинларини муваффақиятли бошлади. Европа яшил майдонларида юртимиз шарафини муносиб ҳимоя қилиб келаётган “Астана” ўз майдонида Даниянинг “Митьюллан” жамоасини қабул қилиб, 2:1 ҳисобида зафар қучди. 

Жамоамиз биринчи таймни кескин ҳужумлар билан бошлади. 31-дақиқага келиб, ушбу ҳужумлар ўз самарасини берди. “Астана”нинг венгриялик ярим ҳимоячиси Ласло Кляйнхайслер узоқ масофадан кучли зарба йўллаб, ҳисобни очди. Иккинчи бўлимда эса меҳмонлар ҳисобни тенглаштиришга муваффақ бўлишди. Ўйин якунланишига саноқли сониялар қолганда яна Ласло Кляйнхайслер узоқ масофадан ажойиб зарба йўллаб, жамоамизга муҳим ғалабани тақдим этди. Эслатиб ўтамиз “Астана” жавоб ўйинини 1 август куни меҳмонда ўтказади.

“Қайрат” ғолиб

Алматининг “Қайрат” жамоаси саралаш ўйинлари иккинчи босқич доирасида Голландиянинг “Аз Алкмаар” жамоасига қарши майдонга тушди. 

Алматидаги “Марказий стадион” мухлислар билан тўлиб тошди. “Қайрат” футболчилари жуда кучли рақиб билан ўйнашига қарамай, кучли ўйин намойиш этиб, 2:0 ҳисобида ғалаба қозонди. 12-дақиқада Адеринсола Эсеола Месси услубида гол киритиб, ҳисобни очди. Иккинчи бўлимда ҳам жамоамиз устунлик қилди. 50-дақиқада Эсеола иккинчи голини киритиб, жамоамизнинг ишончли ғалабасини таъминлади. Жавоб учрашуви 2 август куни бўлиб ўтади. 

“Тобол” омадли жамоа

Қўстанайнинг “Тобол” жамоаси иккинчи саралаш босқичини омадли бошлади. 

“Пюник”га қарши ўтказган учрашув қўстанайликларга қийинчилик туғдирмади. 49-дақиқада Максим Федин узоқ масофадан зарба йўллаб, ҳисобни очди. 80-дақиқада “Ордабасы”нинг собиқ футболчиси Азат Нурғалиев дарвозабоннинг хатосидан фойдаланиб, ҳисобни 2:0 кўринишига олиб келди. “Тобол” ўйинни ушбу ҳисоб билан якунлаши мумкин эди, аммо, 90-дақиқада рақиблар ҳисобни қисқартиришга муваффақ бўлишди. 

Жавоб учрашувларида барча жамоаларимизга омад тилаймиз!