Мана, ҳадемай ички биринчиликнинг иккинчи давра ўйинлари якунланади. Ўтган 21-тур ўйинларида бор йўғи 12та гол киритилди. Шулардан 4тасини қозоғистонлик футболчилар уришса, қолган 8та голни легионер футболчилар киритди.

Турнинг дастлабки голини 22-дақиқада “Атырау” футболчиси Бабатунде “Қайсар” дарвозасига киритса, сўнги голни ҳам “Атырау” футболчиси Марат Хайрулин 93-дақиқада киритиб, жамоасига 2:1 ҳисобидаги ғалабани тақдим этди. Ушбу турда ҳакамлар ягона пенальтини “Шахтёр” дарвозасига белгилади, уни “Қайрат”нинг легионер футболчиси Андрей Аршавин амалга ошириб, жамоасини аламли мағлубиятдан қутқариб қолди. 

Шимкентнинг “Ордабасы” жамоаси ушбу турда Қўстанайнинг “Тобол” жамоасига қарши майдонга чиқиб, дуранг натижа қайд этилди. Дастлаб, 54-дақиқада “Тобол” футболчиси Аслан Дарабаев ҳисобни очса, 64-дақиқада шимкентликлар ҳисобни тенглаштирди. Гол муаллифи – Неманья Коич. Шимкентликлар ушбу дурангдан сўнг турнир жадвалидаги ўзининг тўртинчи ўринини сақлаб қолди.  

Шуни ҳам таъкидлаш керакки, 21-тур тартибли ўйинлари билан ажралиб турди. Ушбу тур ўйинларини стадиондан туриб жами 29300 мухлис томоша қилган. “Ақтўбе” ва “Астана” ўртасидаги учрашув энг кўп ишқибоз йиғилган ўйин. Унда стадионга жами 12800 киши кирган.

21-турга қадар энг кам гол урган жамоа бу – “Қизил-Жар СК”. Уларнинг ҳисобида 16 та гол мавжуд. Энг кўп гол киритган жамоа эса, амалдаги чемпионимиз – “Астана” жамоаси. Астаналиклар рақиб дарвозасига 46та тўп уришган. 

Ушбу турга қадар тўпурарлар рўйхатида “Ақтобе” жамоаси легионери Маркос Пиззелли 14та гол билан пешқадамликни ушлаб турибди. 11та гол билан “Қайрат” футболчиси Адеринсон Эсеола иккинчи, “Қайрат”нинг бразилиялик легионери Исаел Барбоза 9та гол билан учинчи ўринларда боришмоқда.