Президент Туркистон шаҳри янги маъмурий марказини ривожлантириш лойиҳаси билан танишди

Элбоши Н. Назарбаев Туркистон шаҳрига расмий сафари давомида аввало, Туркистон шаҳрининг ривожланиш концепцияси билан танишиб, тантанали равишда янги маъмурий-тадбиркорлик марказининг капсуласини солди. Туркистон вилояти ҳокими Жансейит Туймебаев Давлат раҳбарини шаҳарнинг Бош режаси билан таништирди. Нурсултан Назарбаевга инфратузилмавий иншоотлар, ижтимоий-маданий ва спорт мажмуалари, маъмурий бинолар қурилиши ҳақида батафсил маълумот берилди.

Келгусида шаҳар ҳудуди кенгайиб, ер майдонлари қўшилади. Унда вилоят ҳокимлиги, республика минтақавий бўлимлари, кўп қаватли уйлар, театр, кутубхона, музей, мактаб, болалар боғчаси, стадион, шифохона, хиёбон каби бошқа ижтимоий иншоотлар ва турли ташкилий органларнинг иморатлари жойлашади.

Янги маъмурий тадбиркорлик марказининг уй-жойга ажратилган ер участкаси билан биргаликда майдони 670 гектарни ташкил этади. Маъмурий-тадбиркорлик марказининг ер майдони 225 гектар.

Марказ қурилишининг дастлабки босқичи 2019-2021 йилларга мўлжалланган. Шу вақт оралиғида умумий майдоннинг 20 гектари ўзлаштирилади. Қурилишнинг дастлабки босқичида ҳокимлик биноси (4545 кв.м.), вилоят маъмурий бошқармаларининг бинолари (24242 кв.м.), республика минтақавий бўлимлари (56880 кв.м.), Конгрес холл (1500 кв.м.), «Туркистонгенплан» маркази (3000 кв.м.) қурилиши тўлиқ тугалланади.