Шимкент шаҳридаги “Туркистон” саройида Парламент Сенатининг депутатлари сайлови ўтди. Ёдингизда бўлса, республика аҳамиятига эга шаҳар мавқеини олган Шимкент шаҳридан илк бор Сенат депутатлигига номзодлар кўрсатилган эди.

Ушбу сиёсий тадбирда иштирок этган шаҳар маслаҳатининг 26 нафар депутати номзод сифатида рўйхатга олинган 6 номзодга овоз берди. Бунга қадар Марказий сайлов комиссияси 9 номзоднинг рўйхатга олинганини маълум қилган эди. Бироқ, сайлов олдидан номзодларнинг уч нафари номзодини қайтариб олди. Қолган даъвогарлар орасида “Банк Центр Кредит” ҲЖ Шимкент шаҳар филиали бошқарувининг бошлиғи Серик Алданов, Шимкент шаҳар маслаҳати котиби Нурлан Бекназаров, “Global A” МЧБ директори Бижан Жилкелдиев, “Манкент санаторийси” ҲЖ бош директорининг ўринбосари Ғани Қарабеков, вақтинча ишсиз Дархан Сатибалди ва “Шимкент-сауда” МЧБ директори Асқарбек Уркимбаевлар бор эди.

Сайлов натижасига кўра Дархан Сатибалди 21 овоз, Шимкент шаҳар маслаҳатининг котиби Нурлан Бекназаров 22 овоз билан ғалабани қўлга киритишди. Энди шаҳар сайлов комиссияси сайлов натижаларини Марказий сайлов комиссиясига йўллаб, сайлов натижасини расмий эълон қилади.

Шимкент шаҳар сайлов комиссиясининг раиси Марс Елекеевнинг айтишича, сайловда қонуннинг барча талаблари сақланди. Энди қонун талабларига кўра, Марказий сайлов комиссияси 7 кундан сўнг қарор чиқариб, депутатларга тегишли мандатни беради.

 Таъкидлаш жоизки, Давлат раҳбари Н. Назарбаев август ойининг бошида Шимкент шаҳридан ҚР Парламент Сенати депутатларини сайлаш тўғрисидаги Фармонга имзо чекканди. Бу – Шимкент шаҳрининг республика аҳамиятига эга шаҳар даражасига эга бўлиши туфайлидир.