Давлат раҳбари Н. А. Назарбаев Туркистон вилоя­­­­­­­тига расмий сафарида бир неча компанияга Тур­кистон шаҳридаги маъмурий марказда иншоотлар қуришни топширган эди. 

Шу муносабат билан Туркистон вилояти ҳокими Жансейит Туймебаев қозоғистонлик сармоядорлар – “BI Group” ҳамда “Саутс-Ойл” компаниялари вакилларини қабул қилди. Учрашувда сармоядорлар вилоят маркази Туркистон шаҳрини ривожлантиришга ҳисса қўшишини билдириб, “BI Group” компанияси Туркистон шаҳрида 50 минг квадрат метрни ташкил қиладиган бизнес-марказнинг лойиҳасини тавсия этди. Марказда офислар учун хоналар, мажлис заллари, ерости автотураргоҳи қурилади. “Саутс-Ойл” компанияси 120 хонали 5 юлдузли меҳмонхонанинг меъморчилик-лойиҳа эскизлари билан таништирди. 

Минтақа раҳбари уларга эскизларни янада мукам­­­­маллаштириб, қурилишни вақтида бошлаш лозимлигини уқтирди.

– Маъмурий-тадбиркорлик марказида вилоят ҳокимлиги, бошқармалар ва департаментлар, конгресс маркази билан “Рихсос” меҳмонхона биноларининг қурилиши тенг олиб борилади. Ишчилар уч сменада ишлашади. Барча биноларнинг лойиҳасини тўлиқ ҳозирлаб, қурилишни бугун бошлаш керак, – деди Жансейит Қансейитули.

Компания вакилларининг айтишича, мазкур иншоотлар қурилиши бир ярим йил ичида тўлиқ тугалланади.

Учрашувга якун ясаган Ж. Туймебаев сармоявий лойиҳа­ларни амалга ошириш учун сармоядорлар ҳамда ҳокимлик ўртасида қўшма иш режасини тайёрлаб, ишчи гуруҳи тузишни топширди.