Ним қоронғи хонадан ачимсиқ ҳид келар, деворлари захдан кўкариб кетганди гўё. Кичкинагина дарчадан милтирабгина ой нури тушиб туради. Бу ернинг “доимий мижозлари” учун кун билан туннинг фарқи йўқ, ҳукмронлик Вақтнинг қўлида. Фақат мустаҳкам бардош, чидам бўлса бас. Тақдирларини сабрнинг ҳукмига топширган улар.
Шундай хоналарнинг бирида ётган йигит даричадан тушаётган ёғдуга жимгина тикилиб, афсусу надоматга йўғрилган қисматига тан берган ҳолда, ёлғизликнинг қаттиқ болишига бошини қўйганча, онаси ҳақида ўйларди.
У билан ғойибона суҳбатлашарди: “...Онажон... билмадим, Сизга хат ёзишим ўринлими ё йўқ, орадан шунча йил ўтса-да, ҳеч унутолмаяпман. Бу ерда ўтказаётган ҳар кун, ҳар онида виждоннинг сўроқлари билан юзма-юз келиб, қалбимни кемириб бораётган аламли пушмонларга бутун борлиғим билан жавоб бераётганимни сўз билан етказолмайман. Ҳа, мен афсусдаман...
Оғриқсиз, қийноқсиз кечган дамларимни ҳеч эслолмайман. Зирқираётган танамни қучганча туни билан Сиз ҳақингизда хаёл сураман. “Онам нима қилаётган экан-а?” Ёстиғимнинг остида сақлаётган кичкинагина суратингизга боқаман. Сиз билан хаёлан суҳбатлашаман. Меҳр-муҳаббатга тўла нигоҳларингиз қаъридаги қайғу барибир ўзини сездириб туради. Гарчанд тилсиз суратингизга боқиб, тонггача сўзлашсамда, дардларим тугамайди гўё. Наҳотки, Сизни кўролмасам, маҳкам қучоқлаб, бағрингизга сингиб кетолмасам... Ё оёқларингизга йиқилиб, “Мени кечиринг, она” дея олмасам...
Қанийди, шу кунлар тезроқ келсайди, қанийди, симиллаб оғриётган юрагимни ҳовучимга олсаму, муборак пойларингизга пояндоз айласам... Қанийди...!
Биламан, Сиз шунда ҳам лом-мим демай, ҳар доимгидек, майин жилмайиб тураверасиз. Аслида борлиғингизни куйдираётган ўтнинг исканжасида қолсангизда, ёлғизгина, ҳа ёлғизгина болангизга “йўқ” дея олмасдингиз. Чунки, Сиз онасиз! Суякни сирқиратиб, этдан ажратиб топган оқибатсиз фарзандингиз Сизга хиёнат қилса-да, кўчага ҳайдаб солса-да, ёш тўла кўзларингизни мендан беркитиб, енгларингизга артдингиз, ”Ўзинг биласан, болам”, дея олдингиз фақат! Шунда ҳам мени аядингиз! Ё Раббим, бу ҳақиқатни кеч англадим. Жуда кеч! Қанийди, бешафқат вақтни ортга қайтаролсам, ўша кўз ёшларингиз суртган қадоқ қўлларингизни кўзларимга тўтиё қилсам. Розиман, бир умрга кўр бўлиб қолсамда, розиман. Фақат ёшли кўзларингизни кўрмасам бўлди.
Онажоним, меҳрибоним!
Сизни бир кунда қаритибман-а! Қаддингиз дол бўлиб қолганини ҳам сезмабман-а. Сарғайиб қолган юзингизга бемаврид тушган ажинлар, қордек оқарган сочларингизни ҳам пайқамабман-а!
Кулгу тарк этган лабларингиз ҳаттоки бир табассумгада мажолсиз. Қалтироқ қўлларингиз дуо қилишга, қувватсиз оёқларингиз қадам босишга мадорсиз. Қариганда ёлғиз дилбандингизга эмас, ёғоч ҳассага суяндингиз. Ҳа, бир асочалик хизмат қилолмадим, қадрингизга етолмадим-а!
Дардкашим, онам! Ёдингиздами, мактабдан қайтгач, кўксингизга бошимни қўйиб, кўзларимни юмиб олардим. Ҳа, у вақтлар бебаҳо. Юмшоққина қўлларингиз билан майин сочларимни силар экансиз, астагина жилмайиб, “менинг ёлғизим, борлиғим ўзингсан”, дердингиз. Ҳа, бу сўзлар қулоғим остида ҳамон жаранглайди.
Боғу бўстоним, онам! Эслайсизми, мактабни битирган йилларимни? Юзимга боқиб, ҳадеб кулаверардингиз. Кўзларингиздан қайноқ ёшлар оқарди. Бу севинч ёшлари, шукрона ёшлари эди. Ёлғиз ўғлининг камолини кўриш, орзу-ҳаваслар ичра яшаш нақадар тотли эди Сиз учун.
Иккимиз ҳам бахтиёр эдик. Лекин, бешафқат қисматнинг рашки келдими, бахтимизга чанг солди!
Ишонган боғим, онам! Ҳаётнинг ўнқир-чўнқир сўқмоқларидан қоқилмай ўтиш, тақдир синовларига мардонавор бардош бериш учун мустаҳкам ирода керак экан! Мен-чи?
Олов ёшликнинг бетизгин хаёлларига берилиб, шайтон васвасасига учибман. Насиҳатларингизга қулоқ осмай, ўртоқларимга қўшилиб, тамаки тортишни бошладим. Шаробнинг кайфи тонггача тарамасди. Ўшанда берган танбеҳларингиз малол келар, сўзларингиз ёқмасди.
Энг афсусланарлисини айтайми? Менинг ҳаётда қилган улкан хатоим, ўйламай босган қадамим бугун иккимизни ажратиб турибди.
Дилда борим, онам! Мен аста-секин гиёҳвандликка ўргандим. Яна ҳам ачинарлиси, қиморга муккамдан кетдим! Ўйнамасам туролмасдим, чекмасам яшолмасдим! Ўша пайтларда ютган ҳаром пуллар, бевафо шон-шуҳрат кўзларимни кўр қилиб қўйганди. Лекин барчаси омонат, ўткинчи экан! Бугун шоҳ бўлсам, эртага гадо эдим!
Ғамгузорим, онам! Ўша кунни эсласам, ҳамон ўзимдан жирканаман. Вужудимни қамраб олган нафрат ўтида ёнаман!
Ўша мудҳиш тун, бутун бойлигимни, бору йўғимни қиморга бой берган тун ҳамон кўз олдимда!
Ақлу шууримни эгаллаб олган қизиққонлик рақибларимдан енгилсам-да, қайта-қайта ўйнашга даъват этарди. Охири пулим тугаб, уйимизни қиморга тикишгача бордим! Ҳа, уйимизни! Ўша Сиз мени ардоқлаб ўстирган, илк тетапояларимни кўриб қувонган, не-не орзу-ҳавасларингиз кечган масканни бой бердим!
Меҳрибонгинам! Мендек ношуд, нотавон болани тағинам ер кўтариб юрибди-да. Онасини кўчага ҳайдаган, бору йўғини қиморга тиккан боладан энди на умиду на хайр кутиб бўлади!
Суянган тоғим! Бардошингиз метин экан. Уйсиз қолсангизда, аҳволимни тушуниб, индамадингиз... Жимгина туравердингиз... Сўнг... ҳеч бир нарсангизни олмай, ортингизга ҳам боқмай, қоронғи кўчадан кетавердингиз... Босган ҳар қадамингиздан ер инграр, юзингизни юваётган ёшлар қалбингиздаги оташни ўчиришга ожиз эди. Ўша тун жала қуйди, сизнинг қайғу-ҳасратларингизга дош беролмай, осмону фалак фарёд чекди, кўз ёшлари дарё бўлиб оқди.
Жону жаҳоним! Бугун қоронғи, зах хонада ёлғиз ўзим қолгандагина қадрингизни англадим, соғинч ҳисси бутун вужудимни зирқиратган пайтда бошимни тош деворга урдим. Кўзим ярқ этиб очилди, гўё. Бироқ эндим кеч эди.
Қўлларимга кишан солинган, озодликдан маҳрум эдим.
Бу ерда вақт ўтмайди, ташқи дунёдан деярли узилиб қолганмиз. Имиллаб ўтаётган онларимизни ортда қолдириб, эркинликка чиқадиган кунимизни санаймиз.
Ҳар биримизнинг тақдиримиз бошқа-бошқа бўлсада, баримизнинг дардимиз бирдек гўё. Тезроқ вақт ўтсаю, онамиз бағрига қайтсак.
Сизга яна бир гап айтайми? Мен бу ерда Аллоҳни танидим. Чин дилдан ихлос қилган, қилмишидан пушаймон бўлиб, ибодат қилган бандага Аллоҳ ҳамиша раҳмли экан. Унга яқинлаштирувчи эса намоз экан. Мен намоз ўқишни бошладим. Ҳа, ҳа, ажабланманг. Вақт топилди дегунча, Қуръон тиловат қиламан.
Онажоним! Худо хоҳлаб, озодликка чиқсам, Сизни ҳажга олиб бораман! Ягонам, лоақал шу билан озгина бўлса-да, гуноҳимни юмшатсам! Кошки эди...
Суратингизга термуламан. Азиз бошларингизга ярашган оппоқ рўмол, устингиздаги либос сизга қуйиб қўйгандай. Ҳар доимгидек, майингина жилмайиб, бошларимни силайсизда, астагина “Болагинам” дейсиз. Шунда мен бағрингизга отиламану, дунёнинг бор ташвиш-аламларини унутаман. Э воҳ, шу кунлар тезроқ келақолсайди...
Намоздан сўнг қўлларимни дуога очиб, Яратганга илтижо қиларканман, кўз олдимда сиз намоён бўлаверасиз. Чунки Сиз менинг борлиғим, тириклигим, саждагоҳим.. Каъбатуллоҳимсиз...