«Қозоғистонда дори воситалари нархларини созлаш тўғрисида» Қонуни қабул қилинди

2019 йилнинг 1 январидан бошлаб Қозоғистонда барча дори воситаларининг чекланган нархлари тасдиқланди. Юртимизда дори воситалари нархларини созлаш масаласи Парламент Сенатининг пленар мажлисида муҳокама қилинди.

ҚР Соғликни сақлаш вазири Е. Биртановнинг маълум қилишича, ушбу ўзгаришлар Қозоғистон Республикаси Президентининг Мактубида белгиланган вазифалар ҳамда «Аҳолини дори воситалари ва тиббиёт буюмлари билан таъминлаш тизимини такомиллаштиришга доир қўшимча чора-тадбирлар тўғрисида» қарори доирасида ишлаб чиқилган. 

– Қонун лойиҳасининг асосий мақсади – фуқароларни арзон баҳода зарур дори воситалари ва тиббиёт буюмлари билан таъминлаш, соғликни сақлаш ҳамда аҳолини ижтимоий ҳимоя қилиш соҳасида давлат сиёсатининг самарали амалга оширилишини назорат қилиш, – деди Е. Биртанов. – Шунингдек, улар нархларининг сунъий равишда оширилиш ҳолатларининг олдини олиш масалаларига алоҳида эътибор қаратишдан иборат.

Вазир Россия ва Беларусда дори воситларининг нархлари қатъий белгилангани ва бу яхши самара бераётганини мисол қилиб келтирди. 

– Юртимизда фармацевтика саноатини ривожлантириш ва фармацевтика маҳсулотлари ишлаб чиқаришни модернизациялаш мақсадида маҳаллий дори воситалари ва тиббиёт буюмларини ишлаб чиқарувчиларга солиқ ва бож тўловида имтиёзлар берилган. Шунга қарамай, дорилар баҳоси ўсиб боряпти. Алмати ва Астана шаҳарларида ўтказилган мониторинг натижасида уларнинг нархларидаги тафовут 100 фоизгача бораётгани аниқланди. Ушбу Қонун лойиҳаси қабул қилинса, дори воситалари нархларини созлаб туриш имконияти яратилади, чакана ва улгуржи нархлар ҳақидаги ахборот шаффоф бўлади. Бунинг учун телефонларга мобиль қўшимча такомиллаштирилмоқда.