Туркистон вилояти ҳокими Жансейит Туймебаев туркистонлик кўп болали она Жазира Турғиновани қабул қилди. Учрашувда минтақа раҳбари қаҳрамон онага Тўлебий тумани Ленгер шаҳридаги 4 хонали уй калитини топширди. Уй соҳибасини ушбу шодиёна билан табриклаб, самимий тилакларини билдирди.

– Куни кеча Жазира ёшлар форумида иштирок этиб, Элбошимиз билан учрашди. У яқинда 28 ёшга тўлади. Шу ёшига қарамай 7 фарзандни тарбияламоқда. Ёш онанинг ҳар бир фарзанди мамлакатимизнинг келажаги ҳисобланади. Умр йўлдошингиз Ўлжас иккалангизни янги уй билан муборакбод этиб, сизларга шодлик, ютуқлар тилайман, – деди Жансейит Қансейитули.

Ўз навбатида ёш она Элбошига, шунингдек, вилоят раҳбарига чексиз миннатдорчилигини билдирди. 

Минтақа раҳбари тадбир давомида болаларга совғалар улашиб, улар билан эсдалик суратга тушди.

Жазира Турғинова – Туркистон вилояти Тўлебий туманининг фуқароси. 27 ёшида 7 фарзанд кўрган, бугунги кунда 3 қиз, 4 ўғилни тарбияламоқда. Тўнғичини 18 ёшида туққан Жазиранинг ҳозирги кунда каттаси 11 ёшда, кичиги Алихан эса 7 ойлик.

Айтганча, ўтган йили Туркистон вилоятида аҳоли сони 3,5 минг кишига ўсган. 2018 йил 1 декабргача бўлган маълумотга кўра, вилоят аҳолиси 1 977 768 одамни ташкил этди. Минтақамиз туғиш ва табиий ўсиш кўрсаткичлари бўйича республикада биринчи ўринда. 2018 йилнинг январь-ноябрида туғиш кўрсаткичи бўйича вилоятнинг республикадаги улуши 13,6 фоиз бўлди, яъни 49 978 чақалоқ туғилган.