Давлат раҳбари ўзининг “Тўртинчи саноат инқилоби шароитларида ривожланишнинг янги имкониятлари” мавзуидаги Мактубида аграр шўъбани иқтисодиётнинг янги драйвери сифатида таъкидлаб ўтганди. Яъни агросаноат мажмуаси иқтисодиётнинг қўзғатувчи кучи бўлади. Шу туфайли агросаноат мажмуасини ривожлантиришнинг янги давлат дастури тасдиқланди, унда, энг аввало, субсидия қоидалари қайта кўриб чиқилди. Натижада кераксиз ҳисобланган субсидиянинг 11та тури олиб ташланиб, 40 турининг миқдорига ўзгаришлар киритилди, қолган 14таси ўзгаришсиз қолди. Олиб ташланган субсидиядан тежалган маблағ товар ишлаб чиқарувчиларга берилади.
Вилоятимизда ўтган йили 27 528 хўжаликка 25 млрд. тенге миқдорида субсидия тўланган. Улардан 19 858таси, яъни 72 фоизи электрон рўйхат бўйича субсидияга эришса, 7000 киши имтиёзни давлат корпорацияси орқали олди. 661 фуқародан эса ёзма турда ариза тушган.
Вилоят қишлоқ хўжалиги бошқармасининг раҳбари Нурбек Бадирақовнинг айтишича, бу йил субсидия бериш тартибига ҳеч қандай ўзгариш киритилмади. Бироқ, ўтган йили қандай янгиликлар бўлганини санаб ўтиш жоиз.– Масалан, экиннинг ҳар гектарига тўланаётган маблағ аста-секин соҳаларга йўналтирилмоқда. Яъни сармоявий субсидияга аҳамият кучайтирилди. Бурун хўжалик экинини экса бўлди, унинг юқори ёки паст ҳосил етиштирганига қарамасдан қўллов маблағи тўланаверарди. Энди хўжалик ўз фаолиятини ривожлантириш учун қуйган сармоянинг 25 фоизини субсидия ҳисобида давлатдан олади. Мана, бултур сармоявий субсидия дастури тайёрланди. Бунга мол бўрдоқилаш майдонларини барпо этиш, техниканинг барча турларини олиш, қўшимча иссиқхона қуриш, томчилатиб суғориш усулларини жорий этиш, эриган қор сувини йиғиш учун сунъий сув ҳавзаларини қуриш, жун тайёрлаш пунктига мўлжалланган ускуна сотиб олиш каби жами 40та лойиҳа паспорти тайёрланган. Паспортда кўрсатилган ишлар бажарилган тақдирда чиқимларнинг 25 фоизи қопланади. Шу жумладан, биргина йўналиш бўйича, яъни чорвачиликни ривожлантириш мақсадида қудуқ қазигани учун кетган харажатнинг 80 фоизини давлат қайтариб беради. Бултур сармоявий субсидияларга 7 894,7 млн. тенге тўланди. Унинг асосий қисми яйловларни суғориш мақсадида қазилган қудуқларга, қолгани қишлоқ хўжалиги техникасини сотиб олишга бўлинди. Натижада ушбу лойиҳалар ҳисобидан қишлоқ хўжалиги соҳасига 22 млрд. тенге сармоя жорий этилиб, 1 865 киши иш билан таъминланди, – деди бошқарма раҳбари.
Шунингдек, илгари қандай бўлса ҳам бўрдоқиланаётган новвосларнинг барчасига субсидия берилган, 2018 йилнинг сўнгги ойларидан бошлаб мол наслини яхшилаш йўналишига кўпроқ эътибор қаратилаётир.
Масалан, наслдор новвосдан қочган сигирнинг бузоғи етилганидан сўнг саноат асосида мол бўрдоқилаш майдонига ўтказилганида унинг тирик вазнига ҳар килоси учун 200 тенгедан берилади. Шу билан бирга, сотиб олган одам уни семиртирса, қўшилган вазнига ҳам 200 тенгедан тўланади. Ўтган йили худди шундай йўл билан 179 агротузилма 14 минг бош танани мол бўрдоқилаш майдонларига ўтказиб, субсидия олган. Бугунги кунда улар бўрдоқиланмоқда. Демак, хўжалик новвосларнинг қўшимча вазнига қараб яна тўлов олади.
Асл зотли мол сотиб олишни субсидиялашга келадиган бўлсак, баҳоси 225 минг тенгегача бўладиган урғочи молнинг нархи давлат томонидан қопланади. Яъни 500 минг тенгега олинса ҳам унинг 225 минг тенгеси субсидия турида қайтарилади. Наслдор буқалар қанча пулга сотиб олинса ҳам уларнинг ҳар бошига 150 минг тенге субсидия берилади. Қўрадаги оддий жайдари молларга наслдор новвос қўйилган тақдирда ҳар бир оналикка 10 минг тенгедан, наслдор оналик олиб келинса, уларга 20 минг тенгедан ёрдам пули берилади.
Нурбек Бақтибайулининг айтишича, қўйлар учун ҳам субсидия мўлжалланмоқда. Ҳар бир бошга – 3000 тенгедан. Аста-секин такомиллашган давлат қўлловлари қаторида насияларни субсидиялаш ҳам бор. Илгарилари хўжалигини ривожлантириш учун олган насияларини тўлашга қийналаётганларга баъзи бир имтиёзлар берилмоқда. Яъни иккинчи даражали банклар тавсия қилган 14 фоизли устаманинг 10 фоизини давлат субсидиялайди. Демак, хўжаликка қоладигани атиги 4 фоиз.
– Балиқ хўжалигига ҳам субсидия берила бошлади. Балиққа ишлатилган ем ҳақининг 30 фоизи давлат томонидан қайтарилмоқда. Бундан ташқари, сотиб олинган маъданли ўғитларнинг 50 фоизи субсидияланади. Пахтанинг тоннасига 12 минг тенге, гуручнинг тоннасига 4 минг тенгедан тўланади, – деди бошқарма раҳбари.
Айтганча, энди субсидия олиш учун аризалар “Электрон ҳукумат”нинг веб-портали орқали электрон шаклда қабулланади. Аризалар сармоявий лойиҳани амалга ошириш доирасида 1 февралдан бошлаб қабул қилинмоқда.