Туркистонда дунёда энг тез ўсадиган павловния дарахти экила бошлади. Ҳозирда 10 минг туп кўчат шаҳар дарвозаси олдига ўтқазилмоқда. Тадбирда иштирок этган минтақа раҳбари Ўмирзақ Шўкеев вилоят марказини “яшил минтақа”га айлантириш кераклигини таъкидлади.

– Павловния каби дарахтларни кўпайтириш керак. Яқин келажакда шунга атаб махсус кўчатхона барпо этишимиз лозим. Чунки, жануб иқлими бу дарахтни ўстириш учун жуда қулай. 

Мутахассисларнинг фикрига кўра, павловния дарахти йилига 5 метр, яхши парваришланса, 5 йил ичида 20-25 метргача ўсади. У 6 ҳафта гуллаб туради. Европа мамлакатларида жиҳоз ясаш учун мазкур дарахтдан фойдаланилади. Бундан ташқари, ундан қайиқ, чанғи, теннис ракеткаси, мусиқа асбоблари ва бошқа буюмлар ясаш мумкин.

Туркистонни ривожлантиришнинг бош режасида шаҳар атрофида “яшил белбоғ” барпо этишга 7700 гектар майдон кўзланган. 

Ана шу ҳудудда 488 гектар майдонга 203 496 туп дарахт кўчатлари (қайрағоч, бодом, ўрик, терак, жийда) экилган. Келгусида 300 гектар майдонда кўчатзор очиб, унинг 30 гектарига дарахт уруғларини экиш ва 1212 гектар ер шудгорланиб, 100 гектарга кўчат экиш ишлари олиб борилади.