Шимкент шаҳрида Қозоғистон Республикаси рамзларининг 25 йиллигига бағишланган “Мангу ҳилпирайвер, мовий байроғим!” номли байрам тадбири ўтди. 

4 июнь – Қозоғистон Республикасининг Давлат рамзлари куни муносабати билан уюштирилган тадбир, биринчи навбатда, “25 йил, 25 кўча” байрам намойиши билан бошланиб, шаҳардаги Байдибекбий ёдгорлигидан Т. Рисқулов, Қазибекбий каби 25 асосий кўча орқали “Мустақиллик” хиёбонигача давом этди. Намойишда 20 мотоциклчи, 30 велосипедчи қатнашди. Автобусга эса, меҳнат фахрийлари, жамоат арбоблари ҳамда турли соҳа илғорлари ўтқазилди.

Тантана иштирокчиларини “Мустақиллик” хиёбонининг асосий дарвозаси олдида кутиб олган вилоят ҳокимининг ўринбосари Дархан Сатибалди ва Шимкент шаҳри ҳокими Ғабидулла Абдирахимов минтақа аҳолисини байрам билан қутладилар.

Байрам тадбирининг давоми “Мустақиллик – таянчим” мусиқий-хореографик композициясига уланиб кетди. Оташин ёшлардан таркиб топган, умумий сони 100 одамдан иборат гуруҳ замонавий мусиқага ҳамоҳанг равишда флешмоб уюштириб, рамзлар туширилган, махсус шарларни осмонга учирди.

Тадбир давомида ҳунармандлар ва рассомларнинг “Суратлар сўзлайди” кўргазмаси иштирокчилар эътиборига ҳавола қилиниб, усталар ёш авлод учун рассомлик санъати сирларидан воқиф қиладиган маҳорат дарсини ўтказишса, “Мустақиллик” хиёбонининг марказида жойлашган фаввора майдонида вилосипедчилар ватанпарварлик куйи остида байроқни ҳилпиратиб ушлаш маҳоратини барчага намойиш этдилар.

Сўнг хиёбондаги Рамзлар майдончасида жойлашган байроқ ўрнатиладиган устун янгиланиб, расмий турда кўтарилиб, Давлат Мадҳияси янгради. Ҳарбий зарбли асбоблар оркестри жўрлигидаги хорга боғча тарбияланувчилари, мактаб ўқувчилари, мусиқа коллежи талабалари, ҳарбий хизматчилар, этномаданият бирлашмаларининг вакиллари ҳамда фахрийлар қўшилиб кетдилар.

С. ИСАМАТОВ сурати.