Қадрли жамоат!

Ҳурматли туркистонликлар!

Сизларни 1 Май – Қозоғистон халқининг бирлиги куни билан чин юракдан табриклаймиз!

Мустақиллигимиз мустаҳкам, давлатчилигимиз мангу бўлиши учун, энг аввало, кучли тотувлик ҳамда барқарорлик керак.

Тўнғич Президентимиз, Элбошимиз Нурсултан Назарбаевнинг эл тотувлигини мустаҳкамлашдаги хизматлари беқиёс. Унинг ташаббуси билан ташкил этилган Қозоғистон халқи Ассамблеяси бугунги кунда эл бирлигининг ивитқиси, маънавий қадриятларнинг қайнар булоғига айланди.

Тотувлиги йўқ элдан – бойлик, бирлиги йўқ элдан – барака кетади. Уни ўз ичидан бузилган мамлакатларнинг тақдиридан кўриб турибмиз.

Барқарорлик ва тараққиёт йўлини танлаган Қозоғистон ташқи сиёсатда ҳам тинчлик тамойилини юқори қўя билди. Элимиз жаҳонда барқарорликни сақлаш, ҳамжиҳатликни мустаҳкамлаш йўналишида муҳим ташаббусларни кўтариб келмоқда. Жаҳон жамжамияти расмий Нур-Султаннинг муҳим ташаббусларини юксак баҳолайди.

Тарихи теран, ота-боболар дастурини давом эттираётган Туркистон вилояти аҳли ҳам истиқлол туфайли баланд чўққиларни забт этиб келмоқда. Ҳозирги кунда минтақамизда кенг қамровли бунёдкорлик ишлари авж олиб, янгиланиш жараёни қулоч ёйди. Ушбу муваффақиятларнинг барчаси бирлик ва меҳнатнинг меваси, деб биламиз.

Давлат қурувчи миллат – Қозоқ халқи қадимдан бағрикенглик ва ғамхўрликни, саховат ва тотувликни турмуш тарзига айлантирган. Этнослараро ҳамда конфессиялараро муносабатлар ва ҳамжиҳатлик элни ривожлантиришга бошлашини халқимиз яхши билади.

Бугунги кунда юздан зиёд этнос вакилларини бағрига олган минтақамизда 11та этномаданият бирлашмаси фаолият юритиб келади. Улар Қозоқ элининг ривожланиши, Туркистоннинг гуллаб-яшнашига улуш қўшишни ўз бурчлари деб ҳисоблайди.

Ҳурматли ҳамюртлар!

Бизнинг бахтимиз ҳам, боримиз ҳам – Мустақил Қозоғистон! Эркинлик кўкдан тушган туҳфа эмас. У – боболарнинг қони, жасорати эвазига келган неъмат.

Зеро, шундай экан, бирликни баҳолаб, Қозоғистонни, Туркистонни ривожлантиришга муносиб ҳисса қўшайлик! Бирлик байрами муборак бўлсин!