Туркистонда вилоят этномаданият бирлашмалари ташаббуси билан “Бизнинг танловимиз – бирдамлик ва ҳамжамият” мавзуида минтақавий форум уюштирилди. Мамлакатимиздаги навбатдан ташқари Президент сайловида фаол иштирок этишга халқни чорлаш мақсадида ўтказилган форумда вилоятимиздаги 11та этномаданият бирлашмаси раислари, ёшлар қаноти аъзолари, зиёлилар ҳамда ОАВ вакиллари иштирок этдилар. 

Форумни очган “Жанубий Қозоғистон” вилоят ижтимоий-сиёсий газетасининг бош муҳаррири Алишер Сотволдиев Нурсултан Абишули Назарбаевнинг мамлакат равнақига қўшган ҳиссаси ва Қозоғистоннинг жаҳон саҳнасидаги ўрни ҳақида маъруза қилди.

– Элбоши Н. Назарбаев туркий оламнинг етакчиси бўлиб танилган. Бу биз, қозоғистонликларга берилган юқори баҳодир. Жорий йилги сайловда етти нафар номзод қатнашмоқда. Шулардан бири Элбоши сиёсатининг давомчиси, шогирди Қасим-Жўмарт Кемелули Тўқаевнинг номзоди Қозоғистон халқи Ассамблеяси ва барча этнос вакиллари томонидан қўллаб-қувватланаётганига гувоҳ бўляпмиз. Бугунги форум ана шу масалага бағишланган, – деди Алишер Ғофуржон ўғли. 

Форумда сўзга чиққан чечен-ингуш этномаданият бирлашмаси раиси Ҳасан Бациев бу йилги сайловнинг ўзгачалиги ва чечен-ингуш, вайнах миллатларининг мустақиллик олган йиллардан шу кунгача бўлган фаровон ҳаёти ҳақида гапирди. 

Вилоят ўзбек этномаданият бирлашмаси раисининг ўринбосари Гулираъно Расулова эса номзоднинг “Изчиллик, адолат, ўсиш” сайловолди дастуридаги “Билимли авлод. Умумтаълим андазалари” бўлимига тўхталиб, вилоятимиздаги мактаблар, коллежлар ва олий ўқув юртларининг фаолияти ҳақида айтиб ўтди. 

Форумда “Ахиска” турк этномаданият бирлашмасининг Туркистон вилоят филиали раисининг ўринбосари Ҳасан Алиев ва татар-бошқирд этномаданият бирлашмаси раиси ўринбосари Расил Байковлар ҳам ўз фикрларини билдириб, барчани сайловда фаол иштирок этишга чақирдилар.