Мен бу йигитни кўпдан бери биламан. 90-йилларда қишлоқда ўтадиган ҳар бир тўй-ҳашамда мусиқа асбоблари билан хизмат қиладиган Тўймуродни кўпчилик яхши танир, ўта камтарлиги, хушмуомалалиги учун ҳам жуда ҳурмат қиларди. Замона зайли билан кейинчалик мусиқа асбоблари кўмагида тўй-маъракаларни ўтказиш урфдан қолди. Аммо тўйларга санъаткорларни чақириш қийин пайтларда арзон-гаровга хизмат қилиб, кўпчиликнинг дуосини олган бу санъатсевар йигитнинг обрў-эътибори ошса ошдики, асло камаймади.
Гапнинг рости, авваллари Тўймуродни фақат санъатга меҳр қўйган бир инсон сифатида билардим. Маълум бўлишича, ногиронлигига қарамай, соғлом турмуш тарзига қатъий амал қиладиган моҳир спортчи ҳам экан. Яқинда 50 ёшга тўлиши муносабати билан Кўлкентда уюштирилган катта тадбир баҳона у билан суҳбатлашиб, мен билмаган бошқа инсоний фазилатларга эга эканига иқрор бўлдим. Гурунг асносида Тўймурод уйида мўъжазгина музейи борлигини, имкон бўлса, бориб кўришимни сўранди.
Ниҳоят, келишилган кунида қишлоқ гузарига яқин жойлашган файзли хонадонига кириб бордим. Уй-ҳовли, гарчи янги бўлмасада, саранжом-саришталиги, озодалиги билан ажралиб турар, дарвоза рўпарасидаги икки қаватли мўъжазгина болохона-музей хонадонга янада кўрк қўшарди. Ичкарига кириб, турли йилларда халқимизга хизмат қилган мусиқа асбоблари, хусусан, магнитофон, граммофон, овоз ёзиш ускуналари, фотосуратлар, параолимпиада иштирокчиси сифатида нуфузли халқаро мусобақалардан олиб келинган медаллар, дипломлардан ташқари, чиройли шаклдаги бежирим тошларнинг ҳам борлиги мени ҳайратга солди. Музейга ташриф буюрган ҳар бир одам стол тенниси бўйича 12 марта Қозоғистон чемпиони, халқаро даражадаги спорт устаси, кўплаб халқаро мусобақалар ғолиби Тўймурод Эшимов ҳақида ўзи айтмасада тўлиқ маълумотга эга бўлади.
Бу ерда болалигидан тортиб, то ҳозирги пайтгача бўлган ҳаёт йўлини акс эттирувчи оилавий суратлар ёпиштирилган альбомлар, спорт беллашувларида қўлга киритган ютуқлари ўз аксини топган. Улар орасида Ўзбекистоннинг биринчи президенти И. Каримовнинг қандайдир фермер билан қўл олишиб тушган сурати эътиборимни тортди. Тўймуроднинг айтишича, голландиялик бу фермер асли кўлкентлик Абдунаби Тошниёзов экан. Урушдан кейин баъзи сабабларга кўра чел элда яшаб қолган бу инсон Тўймуроднинг оиласига яқин бўлган экан.
Т. Эшимов оддий, серфарзанд оилада камол топди. Падари бузруквори Мўминжон отанинг асли касби ветеринар бўлсада, турли доривор гиёҳлар кўмагида хасталарни ҳам даволарди. Турмуш ўртоғи Тошой ая билан тўрт ўғил, уч қизни оқ ювиб, оқ тараб вояга етказишди. Тўймурод оилада кенжаси эди. Унинг ёшлигидан мусиқага алоҳида меҳр қўйишида “Шодлик” дастасида фаолият кўрсатган яқинлари Авазхон Эшимов, Авазхон Бойтоев, Саидакбар Саидов сингари инсонларнинг хизматлари кўп бўлди. Айниқса, айни пайтда Ўзбекистонда хизмат кўрсатган артист, хушовоз хонанда Ғиёс Бойтоевнинг Тўймуродга кўрсатган акаларча ғамхўрлиги, маслаҳатлари унинг ҳозирги даражага етишида алоҳида роль ўйнади, десак, янглишмаймиз. Бир маҳаллада ўсган бу инсонларнинг бир-бирига бўлган меҳр-оқибатига ҳавас қилса арзийди.
Тўймуроднинг стол теннисига қизиқиши ўқувчилик давридаёқ бошланган. Илк бор Манкентда ўтган беллашувда фахрли биринчи ўринни эгаллагач, аста-секин туман, вилоят мусобақаларида куч синай бошлади. Малакасини ошириб, ниҳоят, 2008 йилда илк бор Қозоғистон чемпиони унвонини қўлга киритди. Унинг спортдаги маҳоратини яхши англаган устозлари энди нуфузли халқаро даражадаги мусобақаларга йўлланма беришди. 2017 йилнинг март ойида Венгрияда ўтган малакалаштириш беллашувида қишлоқдан келган оддийгина йигит барча рақибларини доғда қолдириб, фахрли биринчи ўринни эгаллади. Шу йилнинг май ойида Словакиядаги халқаро мусобақада ҳам ғолиб чиқиб, спорт устаси сертификатига эга бўлди. Тўймурод билан куни кеча боғланганимизда, яқин кунларда Қўстанайда ўтадиган мамлакат биринчилигида қатнашиш учун жўнаб кетаётганини маълум қилди. Ўйлаймизки, у бу гал ҳам барча рақибларидан ўзиб, бош совринни қўлга киритади.
Айтганча, моҳир спортчи турмуш ўртоғи Гули билан бахтли ҳаёт кечириб, тўрт ўғил, уч қизни одобли-ахлоқли этиб тарбиялашмоқда. Фарзандлар улғайиб, турли касбларнинг бошини тутишган. Кенжаси Рўзимурод ҳали мактаб ўқувчиси бўлсада, отаси изидан бориб, санъатга, тўғрироғи, рассомликка меҳр қўйибди.
Нима ҳам дердик, ҳаётда гарчи тўрт мучаси соғ бўлсада, турмушидан нолиб юрадиган ношукр бандалар кўп учрайди. Бундайларга сўлим Кўлкентда ногиронлигига қарамай, санъатга меҳр қўйиш баробарида спорт билан ҳам ошно бўлиб, мустақил Қозоғистоннинг шаънини чет элларда баланд кўтараётган Тўймурод Эшимов каби қалби пок, руҳан соғлом, ажойиб инсон яшайди, ана шу йигитдан ўрнак олинг, дегим келади.
Суратларда: моҳир спортчи Т. Эшимов