Вилоятимизда фидойи ўқитувчи, жонкуяр шифокор, меҳрибон мураббий, ташаббускор тадбиркор, оқила уй бекаси сингари эзгу касбларни ўзида мужассам этиб, оиласига файзу барака киритаётган, ҳаётимизни бугунгидан-да обод ва фаровон этишга ўз ҳиссасини қўшаётган аёлларимиз оз эмас.  Улар  умр йўлларида қандай оғир синов ва машаққатлар дуч келмасин,  уларни енгиб ўтадилар. 

Айсулу Калкенованинг сўнгги йил­ларда амалга ошираётган эзгу ишлари бунга мисол бўла олади. Янги йил, Наврўз ва бошқа  байрамларда у ногирон болаларга оммавий-маданий тадбирлар ташкил этишни анъанага айлантирган. 

– Менинг уч ёшли ўғлим ногирон. Шу боис, тақдир тақозоси билан яримжон бўлиб қолган болаларнинг аҳволини яхши тушунаман ва ҳис қиламан, – деди биз билан суҳбатда Айсулу. – Байрам тадбирларини ташкил этишда менга «Кўгершин» вилоят ногиронлар уюшмаси яқиндан ёрдам бериб келмоқда. Унинг раиси Байдалхан Айдўсовнинг таклифига кўра жорий йилдаги Халқаро болаларни ҳимоя қилиш кунига бағишланган байрам «Кенг-баба» истироҳат боғида ўтди.  

– Инсонпарварлик устувор тамойилга айланган мамлакатимизда ногиронлар ҳам ҳар жиҳатдан ғамхўрлик остида яшайдилар, – деди Б. Айдўсов. –  Улар­нинг ўксик кўнгилларига малҳам бўла­диган шароиту имкониятлар, имтиёзу қулайликлар муҳайё. 

Шундай бўлса ҳам, ногирон болалар ўзларини ёлғиз ҳис қилмасин, деб турли кўнгил­очар тадбирларни ўтказишни канда қил­маймиз. Бу ишларга бош-қош бўлаётган ташаббускоримиз, қалби дарё  Айсулудан миннатдормиз.

Тадбир сўнгида ҳомийлар ҳиммати билан келтирилган совғалар ногирон­ларга  улашилди.