Бугун Давлат рамзлари – Байроғимиз, Герб ва Мадҳиямиз ҳақида фикр юритадиган кун.
Улар ҳақида 27 йил давомида қанча кўп айтилса ёки ёзилса-да, шунча маъно топаверади, киши. Келинг, бугун яна уларга қайтайлик.
Байроғимизни қаерда кўрамиз?
Ҳамма жойда, биноларда, қўшинларимизда, спорт мусобақаларида, автомобиль рақамларида. Нега?
Чунки Байроқ қайси мамлакатда яшаётганимизни бизга билдириб турадиган буюк тимсол.
Байроқ – нафақат рамз, балки мамлакат тарихини акс эттириб турувчи восита ҳамдир. Маълумки, шонли республикамиз кўп йиллик тарихга эга.
Байроқнинг келиб чиқиш тарихи
Қадимги байроқларнинг ранглари ҳар хил – қизил, яшил, сариқ ва оқ бўлган. Шу ерда савол туғилади. Нима учун байроқ ранги ўзгариб, унга турли бўёқлар ишлатилган?
Байроқнинг рангига қараб, шаҳарга қайси душман яқинлашиб келаётганини билиш мумкин бўлган экан. Қўшин Ватанига қайтиб келаётган лашкардир, балки душман қўшини ёки дам олишга муҳтож бўлган қўшни давлатнинг аскарларидир? Шу тариқа жангчилар қўлидаги байроқларнинг рангларига қараб, уларнинг кимлигини аниқлаш мумкин бўлган. Агар душман шаҳарни эгалласа, дарров ўз байроғини илиб, ҳукмронлигини эълон қилган.
Вақт ўтиб, турли мамлакатларнинг раҳбарлари ўз байроқларининг ҳажми, ранги қандай бўлишини ўзаро келишиб олишган. Шунинг учун дунёда мамлакатлар кўп бўлсаям, байроқлари ранг-баранг.
Мустақил Қозоғистонимизнинг байроғи ҳам ўзига хослиги билан ажралиб туради.
Байроғимиздаги ранглар қандай маънога эга?
1992 йилда қабул қилиниб, халқаро муносабатларда Қозоғистон Республикасининг тимсоли ҳисобланиб келаётган байроғимиз мовий рангда. Осмон ранги мангу осмон ва оби-ҳаёт рамзи бўлиб, бу ҳалолликни, шон-шуҳрат ва садоқатни билдиради. Туркийлар замонида байроқлар оч зангори рангда бўлган. Байроқнинг бир хил рангда бўлиши мамлакатимизнинг яхлитлигини, бирдамлигини билдиради.
Қуёш азалдан бойлик ва тўкинлик, ҳаёт ва энергия манбаи ҳисобланиб келган. Шунинг учун қуёшнинг заррин нурлари буғдой бошоқлари ҳаётий озуқа ва фаровонлигимиз белгисидир. Шу билан бирга навқирон давлатнинг куч-қудратини ва бошқа давлатлар билан ҳамкорликка тайёрлигини изоҳлайди.
Бургут тасвири азалдан турли мамлакатларнинг байроқларида акс этиб келган. Нега? Бу тимсол, одатда ҳукмронлик, бағрикенглик маъноларини ифодалайди. Бизнинг байроқда унинг келтирилиши давлатнинг мустақиллигини, унинг олий мақсадлар ва барқарор келажак сари интилаётганини кўрсатади.
Айтганча, қадим замонлардан кўчманчи халқлар дунёқарашида бургут алоҳида ўрин тутган. Бу қуш образи эркинлик ва вафодорлик, олижаноблик ва жасорат, поклик ва куч-қувват каби тушунчаларни беради.
Байроқдаги қозоқ халқининг миллий нақши Қозоғистон халқининг миллий-маданий анъаналарини ўзида мужассамлаштиради.
Давлат герби
Мустақил Қозоғистоннинг бу рамзида энг кўзга ташланадиган элементлар қайсилар?
Гербимизда яққол кўзга ташланадиган марказий элемент – чанғароқ. Чанғароқ аслида евроосиёлик кўчманчиларнинг турмуш тарзини акс эттирувчи асосий тимсол. У орқали давлатимиз мамлакат ҳудудида истиқомат қилаётган барча халқларнинг ягона ва умумий уйини ифодалайди.
Уйиқлар қандай мазмунга эга? Уларга қараб, қозоғистонлик ҳар фуқаронинг фаровон турмуши, худди чанғароқнинг маҳкам ва барқарор турган уйиқлари каби бўлишини англаш мумкин.
Афсонавий учар отлар – тулпорлар азалдан мардлик, садоқат ва куч-қудрат тушунчаларини англатиб келади. Нима учун арғумоқлар мустақил давлатимиз гербига жойлаштирилган? Улар Қозоғистон ҳудудида қадимдан мавжуд бўлган кўп миллатли халқнинг тарихий орзуси – кучли ва фаровон давлат барпо этиш бўлганини ифодалайди. Тулпорларнинг олтин рангдаги қанотлари, буғдой бошоқларининг тасвири халқимиз меҳнатсеварлиги ва моддий фаровонлигининг қутлуғ рамзидир.
Гербдаги шохлар тўкинлик тимсоли бўлса, беш қиррали юлдуз қозоғистонликларнинг жаҳондаги беш қитъа вакиллари билан дўстона муносабатлар учун очиқ эканлигини билдиради.
Гербнинг пастки қисмидаги “Қозоғистон” ёзуви давлатимиз номини кўз-кўз қилиб туради.
Давлат мадҳияси
Азиз газетхон! Сиз бу машҳур қўшиқни кўп эшитгансиз, юракдан қўшилиб куйлаган бўлсангиз ҳам ажаб эмас. Унинг сатрлари қалбларни тўлқинлантиради, Ватан учун фахр-ифтихор туйғусини уйғотади, беихтиёр кўзларга ёш келтиради. Бу – Мадҳиямиз.
Мадҳия – тантанали мусиқий асар. Мустақил Қозоғистон Мадҳиясининг сўзлари Жумекен Нажимеденов ва Нурсултан Назарбаевлар томонидан ёзилган, куйини Шамши Қалдаяқов басталаган.
Унинг тарихи ҳам ажойиб.
2000 йилда мамлакат Президенти Н. Назарбаев Мадҳияни ўзгартириш ҳақида Парламент Мажлиси раҳбариятига топшириқ беради. Бир неча ҳафтадан сўнг Мажлис депутати Н. Рустемов “Қозоғистон Мадҳиясини Назарбаевнинг шеъри бўйича ўзгартириш бўйича” қонун лойиҳасини Мажлис муҳокамасига қўйишни таклиф этади.
Шу тариқа 2001 йилда Мадҳия қабулланади.
2006 йил 7 январда эса 1956 йилда ёзилган машҳур “Менің Қазақстаным” қўшиғи Қозоғистон Республикасининг бугунги Мадҳияси этиб қабулланади ва тегишли мақом олади. Матнга қўшимчаларни Давлат раҳбари Н. Назарбаев киритгани учун у ҳаммуаллиф сифатида эътироф этилади. Мадҳияни тинглаш тартиби ҳам бироз ўзгаради. Энди расмий тадбирларда бу қўшиқ янграган пайтда ҳамма ўрнидан туриб, ўнг қўлини кўкрагининг чап томонига қўйиб туриши шарт.
Ватан, бу – дунёдаги энг буюк сўздир. Ватан туйғуси болаликдан қалбларимизда мавжуд. Она Ватанимизни бизга эслатиб турадиган, унинг бебаҳолигини, муқаддаслигини, ҳеч қандай бойликка алмаштириб бўлмаслигини билдириб турадиган тушунча унинг рамзларидир. Эътиборингизга ҳавола этилган мақолада ўз юртини севган одам, унинг рамзларини ҳам севиши, ардоқлашини эслатиб ўтиш ният қилинди.
4 июнь – Давлат рамзлари куни миллий байрам сифатида катта тантана билан нишонланиши бежиз эмас. Зеро, сизу бизнинг бугунги тинч, хотиржам ҳаётимиз, давлатимизнинг оқилона сиёсати туфайлидир. Шундай экан, унинг рамзларига ҳам ҳурмат-эътибор, қадр-қиммат ҳеч қачон сусаймаслиги керак.
Яна бир карра Давлат рамзлари куни муборак бўлсин!