Инновациявий технологиялар, инженерия, тадбиркорлик, тиббиёт, иқтисодиёт, маданият ҳамда бошқа соҳаларда дуруст натижага эришган ёш қозоғистонликлар Президент кадрлар захирасининг саралашидан ўтиб, давлат хизматида юқори лавозимга эга бўлиши мумкин, деб маълум қилади Давлат хизмати ишлари агентлиги.

Бундай саралашни шакллантириш тўғрисида Президент Қасим-Жўмарт Тўқаев ўзининг сайловолди дастурида айтган эди. 

Саралаш жараёнида ёши 35дан ошмаган барча қозоғистонликлар иштирок эта олади. Олий маълумот ва беш йиллик иш стажи бўлиши шарт. Захирага нафақат билим даражасини синаш ва суҳбатлашиш орқали, балки етакчилик хусусиятлари, теран фикрлаш даражаси, стратегик муносабат ҳамда мотивацияни баҳолаш каби бир неча босқичлардан ўтиб ҳам кириш мумкин. Ушбу босқичларнинг ҳаммасидан ўтиш учун номзодлар эссе ёзиб, тақдимот ўтказгач, президент маъмурияти саралаш комиссиясининг суҳбатидан ўтишлари лозим.

Номзодларнинг саволномасини Президент қошидаги кадрлар сиёсати бўйича Миллий комиссия кўриб чиқади. Юқорида таъкидланган талабларга мос келадиган барча қозоғистонликлар онлайн тизимда саралашда иштирок этиш учун ариза беришлари мумкин. Саралаш 1 сентябрдан бошланади.