Давлат раҳбари иқтисодий масалалар бўйича мажлис ўтказди

Президент Қ. Тўқаев раислигида ўтган мажлисда жорий йилнинг 7 ойида мамлакатимизни ижтимоий-иқтисодий ривожлантириш якунлари тилга олинди. Унда Бош вазир А. Мамин, Миллий банк раиси Е. Дўсаев, шунингдек, Меҳнат ҳамда аҳолини ижтимоий ҳимоя қилиш вазири Б. Сапарбаев ахборот бердилар.

Мажлис иштирокчилари маҳаллий товар ишлаб чиқарувчиларни қўллаб-қувватлаш, ижтимоий аҳамиятга эга озиқ-овқат товарлари баҳосини ва тарифларни оширмаслик, манзилли ижтимоий ёрдамни тайинлаш, кўп болали оилаларни бошпана билан таъминлаш, шунингдек, иситиш мавсуми ва янги ўқув йилига тайёргарлик масалаларини муҳокама қилишди.

Давлат раҳбари Қозоғистонда иқтисодиётнинг ривожланишига салмоқли туртки бериш мақсадида янги услублар ишлаб чиқишнинг ғоят муҳимлигини таъкидлаб, бунинг учун Ҳукумат, Президент Маъмурияти ва тадқиқотчилар бирлашмасининг мувофиқлаштирилган фаолияти зарурлигига эътибор қаратди.

Қасим-Жўмарт Тўқаев кундаликдаги масалаларни имкон қадар тезкорлик билан ҳал қилиш билан бир қаторда халқаро бозорлардаги салбий тенденцияларни ҳисобга олган ҳолда, иқтисодиётнинг ўрта муддатли ривожланиш истиқболини аниқлаш вазифаси турганлигини таъкидлаб ўтди.

Сўнг Президент Қозоғистон фуқаролари турмуш даражаси пасайишининг олдини олиш учун асосий эътиборни уларнинг манфаатларига қаратиб, аҳоли олдидаги барча ижтимоий мажбуриятларнинг тўлиқ бажарилиши зарурлигини уқтирди.