Давлат раҳбари Қ. Тўқаев Қатарнинг етакчи вазирлик ва идоралари, иқтисодий тузилмалари раҳбарларидан иборат молиявий доиралар делегацияси билан учрашди. Суҳбат чоғида Душанбеда Қатар амири билан эришилган келишувларни амалга ошириш доирасида икки томонлама муносабатларни ривожлантиришнинг кенг кўламли масалалари муҳокама қилиниб, сиёсий, савдо-иқтисодий, транспорт-коммуникация, маданий-гуманитар, сайёҳлик ва бошқа соҳаларда Қозоғистон – Қатар кун тартибидаги долзарб масалалар кўриб чиқилди.

– Жорий йилнинг июнида мен Қатар амири билан учрашиб, икки давлат ўртасида мустаҳкам “кўприк” барпо этиш бўйича аниқ тадбирларни бошлашга келишиб олдик. Мен уни Қозоғистон пойтахтига расмий сафарга таклиф қилдим. Ўйлайманки, бу учрашув самарали бўлади, – деди Қ. Тўқаев.

Қозоғистон Президенти Қатар делегациясининг ташрифи ўзаро ҳамкорликни янада ривожлантиришга туртки беришини таъкидлади.

Делегация етакчиси – Қатар Марказий банки раиси Абдулла Ал Таний ўз давлати раҳбариятининг саломини етказди. 

– Ўзингизга маълум, икки давлат муносабатлари юқори даражада ривожланиб, мустаҳкамланиб бормоқда. Бизнинг ташрифимиз ана шу анъанани қўллаб-қувватлаш мақсадида уюштирилди. Бизни сизнинг молиявий тузилмаларимиз билан қадимий ва тиғиз алоқалар боғлаб туради. Биз банк, молиявий ва сармоявий йўналишларда ўзаро ҳамкорлик қилмоқдамиз. Кеча «Астана» Халқаро молиявий маркази базасида Қатар йирик банкларидан бирининг филиалини очишга келишдик, – деди қатарлик молиячи.

Шунингдек, у икки давлат ўртасида авиақатновини тезроқ йўлга қўйиш, савдо-иқтисодий ва сармоявий алоқаларни янада кучайтиришини таъкидлади.