Жанубий Қозоғистон вилояти ҳокимининг қарори билан вилоят қурилиш бошқармасининг раҳбари лавозимига Қуттибек Рахматуллаули ЖАМАШЕВ тайинланди.

Қуттибек Рахматуллаули 1961 йилда туғилган, олий маълумотли. Алмати меъморчилик-қурилиш институтини тамомлаган. Ихтисоси – қурилиш муҳандиси, техника фанлари номзоди.

Меҳнат фаолиятини 1984 йили Красноярск ўлкасидаги Шарипов шаҳар электр ҳамда муҳандислик тармоқлари муассасасида усталикдан бошлаган. 1986-1992 йиллари Шимкент уй-жой қурилиши комбинатида монтажчи, “Шимкентжилстрой” лойиҳа-қурилиш бирлашмаси монтажчиси, 2-даражали муҳандис бўлиб ишлаган.

Давлат хизматида 1993-2004 йиллар оралиғида Жанубий Қозоғистон вилоят божхона департаменти инспектори, бош инспектори, бўлим бошлиғи лавозимларида меҳнат қилди.

2004-2007 йилларда “Қозоқ-рус текстили альянси” МЧБ бош директорининг тижоравий масалалар бўйича ўринбосари, директори, “Оңтустік махсус иқтисодий минтақаси дирекцияси” директорининг ўринбосари, 2007-2009 йиллари Жанубий Қозоғистон вилоят қурилиш департаменти директорининг ўринбосари, Жанубий Қозоғистон вилоят давлат меъморчилик-қурилиш назорати департаменти директорининг ўринбосари, Жанубий Қозоғистон вилоят қурилиш бошқармаси раҳбари, 2009-2011 йилларда Шимкент шаҳар қурилиш бўлими мудири ўринбосари, бандлик ҳамда ижтимоий дастурлар бўлими мудирининг ўринбосари, қурилиш бўлими бошлиғи лавозимларида хизмат қилган.

2011 йилнинг ноябридан Жанубий Қозоғистон вилояти бўйича давлат меъморчилик-қурилиш назорати ҳамда лицензиялаш департаменти директори, Жанубий Қозоғистон вилоят давлат меъморчилик-қурилиш назорати бошқармасининг раҳбари вазифаларини бажариб келди.