Nur Otan партияси вилоят филиалининг “Ғамхўрлик” дастурида ўтрорликлар ҳам фаол қатнашмоқда. Бунга қадар кўплаб эзгу ишларни бажариб, ёрдамга муҳтож икки оилага уй-жой олиб берган қишлоқ фаоллари хайрия ишларини  ҳаётий шиорларига айлантирган гўё. 

Яқинда яна бир оила дастур доирасида уйли бўлди. Шаулдер қишлоғида 18 йилдан буён ижарада яшаб келган П. Бейсенбиев хонадонида зўр хурсандчилик.

Nur Otan партияси Ўтрор туман филиалининг раиси, туман ҳокими А. Жунисов янги уй соҳибларини қутлаб, рўзғор техникасини тортиқ қилди ва “Ғамхўрлик” дастури бундан кейин ҳам фаоллашиб, ишга яроқли оила аъзоларига иш топиб беришни  ўйлаётганини таъкидлади.

Туманнинг волонтёр ёшлари ҳам бу ишга ўз ҳиссаларини қўшишди. Улар янги уй атрофини тозалаб, ободонлаштиришга кўмаклашишди.

Мўътабар онахон Н. Байдаулетова уй-жойли бўлишига ёрдам берган шаулдерлик мурувватли инсонларга миннатдорчилик билдирди. 

Бугунги кунда Туркистон вилоятида партиянинг “Бахтли оила” лойиҳаси ва “Ғамхўрлик” дастури доирасида мингдан ортиқ эҳтиёжманд одамларга ёрдам кўрсатилди. Партия етакчилигида 5та оила ҳомийлар ҳисобидан уй-жойли бўлди.