Туркистон вилоятида “Ғамхўрлик” акцияси қулоч ёймоқда

Вилоятимизда йўлга қўйилган “Ғамхўрлик” лойиҳасини қўллаб-қуватловчи тадбиркорлар сафи ортиб бормоқда. Кам таъминланган оилаларни ўз қарамоғига олган сахий инсонлар кўпчиликка ибрат бўлиши шубҳасиз. Бунга гувоҳ бўлган вилоят ҳокими Ўмирзақ Шўкеев олис туманларни оралаб, бошпанасиз яшаётган баъзи бир хонадонларда бўлди.

Жумладан, чордаралик Хатича Амансатова 7 қиз ва бир ўғли билан кўп йиллардан буён ижарада кун кечиради. Турмуш ўртоғи ногирон. Тўнғич қизлари коллежда таҳсил олади. Онахон учрашувда минтақа раҳбарига ўзининг уйи бўлишини орзу қилишини айтганда, вилоят раҳбари маҳаллий ҳокимликка ушбу масалани ўрганиб, ижобий ҳал қилишни топширди. 

Тадбиркорлар ҳомийлигида яна бир хонадон бошпанали бўлди. Келес туманида яшовчи Фарида Абдуллаева ёлғиз боласи билан эски уйда яшайди. Мазкур оиланинг аҳволи билан танишган вилоят раҳбари оила бошлиғининг ишсиз эканлигини эътиборга олиб, давлат дастури доирасида ишга жойлаштиришни топширди. Маҳаллий тадбиркор Нурлан Базарбаев ушбу оилани бошпана билан таъминлашни ўз зиммасига олди.

Келес туманида ёрдамга муҳтож 178та оила аниқланиб, барчасига масъул ходимлар тайинланди, кам таъминланган фуқароларга ҳар томонлама ёрдам кўрсатиш топширилди.