Куни кеча Қозоғистон Парламенти Мажлиси депутати, ҳамкасбим Фахриддин Қоратоев телефон орқали боғланиб, Ўзбекистонда сўнгги вақтларда юз берган талафотлар муносабати билан барча ўзбекистонликларга ҳамдардлик билдириб, ҳаммамизга тинчлик-омонлик тилади.

Суҳбат давомида Фахриддин ака интернет тармоқларида баъзи кимсалар томонидан ўзбек-қозоқ дўстлиги, ўзаро ишончини сусайтиришга уриниб, ёлғон лавҳалар тарқалаётганидан дили хира эканлигини билдирди. “Дўстликка путур етказиш провокацияси”ни у кишининг қолган ҳамкасблари ҳам қоралашаётган экан.

Албатта, мен ҳам кўп миллатли Ўзбекистон фарзанди сифатида қардош ва қариндош бўлган Ўзбекистон ва Қозоғистон халқлари ўртасидаги дўстлик ва ўзаро ишонч бардавом бўлишини истайман. Чунки биз бир ариқдан сув ичиб, бир дастурхон атрофида ўтирамиз, нон-туз еймиз, тўйимиз ҳам, азамиз ҳам бир.

Тўғриси, Сардобадаги ҳолат ҳаммамиз учун яна бир синов даври бўлди. Нега, қандай қилиб, ким айбдор?.. Хуллас, саволлар кўп. Бироқ, давлатимиз раҳбари Шавкат Мирзиёев ҳар бир жараённи шахсан назорат қилиб бормоқда ва албатта, талафот сабабига ҳуқуқий баҳо берилади.

Аммо биздаги ишонч, дўстлик ва қардошлик ришталарига баҳо бериб бўлмайди. Чунки унинг баҳоси тенгсиз. Мен бунга ота-боболарим, оилам, ўзим ва униб-ўсаётган фарзандларим мисолида кўп гувоҳ бўлганман: ўзбек-қозоқ – эт билан тирноқ. Бизнинг энг катта бойлигимиз ҳам шу.

Ишончим комил: халқларимиз ўртасида ҳеч қачон тушунмовчилик бўлмайди ва бугун биз барчамиз ота-боболаримиздан мерос ўзаро ишончни сақлаб, келажакка қолдиришга қодир авлодмиз.

Бир-биримизга елкадош бўлиб, дўстлигимизни асрайлик!