Туркистон вилояти туманларида дори воситаларининг етказилиши ва тегишли муассасаларга тўғри тақсимланиши ҳамда дорихоналарда белгиланган баҳода сотилишини назорат қилиш мақсадида махсус штаб қурилган.

Шу кунларда штаб аъзолари касалхона ва дорихоналарда мониторинг тадбирларини юритмоқда. Буни вилоят бош шифокори Марат Пашимов маълум қилди.– Ҳозирги кунда беморлар ҚР Соғликни сақлаш вазирлиги тасдиқлаган махсус протокол бўйича даволанмоқда, – деди у. – Ушбу тартиб бўйича хасталарни даволаш учун вилоятимиздаги касалхоналарда 20 кунга етарли дори-дармон захираси бор. Жамғарма ҳафта сайин тўлдириб борилади. Чунончи, ўтган ҳафтада гуманитар ёрдам тариқасида 48 мингта ҳимоя комплекти келтирилди. Сўнг Ўзбекистондан 100 млн. тенгега 1,5 млн. қутидан зиёд пандемияга зарур дори воситалари олиб келинди. Уларнинг барчаси вилоятдаги касалхоналар, шифохона ва дорихоналарга тақсимланди. Бундан ташқари, Алмати вилоятидан 2 тонна дори воситалари келтирилди. Юкларнинг барчаси қатъий назорат остида қабул қилинди ва тақсимланмоқда, – деди М. Пашимов.