Вилоят фавқулодда вазиятлар департаменти “Келажакка – коррупциясиз” акция-эстафетасини якунлади. Тадбирда минтақадаги шаҳар, туманлардаги ўт ўчирувчиларнинг видеороликлари ва суратлари таҳлил қилинди.

– “Келажакка – коррупциясиз” эстафетаси республика бўйича Жанубий Қозоғистон вилоятидан бошланди. Бугунги кунда эстафета Жамбил вилоятига, сўнг Алматига йўл олади. Шунингдек, ушбу эстафета доирасида бир ой давомида турли тадбирлар уюштирилиб, 15 шаҳар, тумандан акцияда фаол қатнашган энг яхши иштирокчилар аниқланди, – деди ЖҚВ фавқулодда вазиятлар департаменти раҳбари вазифасини бажарувчи, фуқаро мудофааси полковниги Н. Жунисов.

Шунингдек, “Энг яхши видеоролик” номинацияси бўйича III ўринни Тулкибош тумани фавқулодда вазиятлар бўлими эгалласа, II ўрин сайрамлик иштирокчиларга насиб этди. I ўринга Сариоғоч туманининг фавқулодда вазиятлар бўлими лойиқ, топилди.

“Келажакка – коррупциясиз” эстафетасининг муаллифи Шимкент шаҳар фавқулодда вазиятлар бошқармасининг бош мутахассиси, фуқаро мудофааси майори Е. Тасқараев хизмат борасида пора таклиф қиладиганлар  учраб туришини яширмади. Бундай ҳолларда обрўсини туширган ҳамкасблари ҳам йўқ эмас. Шу сабабли, муаллиф сифатида ушбу эстафетанинг республика миқёсида давом этишига ишонади. Шунингдек, у пора берилган ҳолда қонун бўйича ходимлар тегишли органларга хабар беришга мажбур эканини айтди.