Туркий давлатлар ташкилотларининг вакиллари Туркистон шаҳрида очилиши кутилаётган “TURAN” махсус иқтисодий ҳудуд лойиҳаси имкониятлари билан танишиш мақсадида ташриф буюришди. Вилоят ҳокими Ўмирзақ Шўкеев ташриф буюрган Туркия, Озарбайжон, Қирғизистон Республикаси ҳамда Ўзбекистон вакиллари билан учрашди. Унда МИҲнинг концепцияси муҳокама қилинди, лойиҳани амалга ошириш борасида Туркия тажрибаси қўлланиладиган бўлди.
– “TURAN” иқтисодий ҳудуд фаолиятини бошлашидан умидвормиз. Давлат раҳбари Қасим-Жўмарт Тўқаевнинг ушбу ғоясини амалга ошириш борасида кенг кўламли ишлар юритилмоқда. Саноатни ривожлантиришда Туркия катта тажрибага эга. Бу – халқаро даражадаги иқтисодий ҳудуд бўлиши керак. Ҳокимлик томонидан махсус иқтисодий ҳудуд учун ер ажратилиб, инфратузилмасига қўллов кўрсатишга тайёрмиз, – деди Ўмирзақ Шўкеев.
Тадбирда Туркий Кенгаш Бош котиби муовини Ўмер Қўжаман Туркистонда ишлаб чиқаришни ривожлантиришга Туркиянинг йирик сармоядорлари  қизиқиш билдираётганини айтди.
– Бугун Туркистонга Туркий мамлакатлар ташкилотига аъзо мамлакатларнинг турли вазирлик вакиллари ташриф буюрди. Улар махсус иқтисодий ҳудуд шароити, келажаги, лойиҳасини таҳлил қилиб, маърузалар тайёрлайди. Бу – дастлабки қадам. Иккинчидан, ушбу ташаббус қонунийлаштирилиб, амалга ошгач,  Туркистонга йирик тадбиркорлар ва саноатчилар келади. Асосан, Туркия сармоядорлари  келади, деган тахмин бор, – деди у.
Учрашувда Озарбайжон, Қирғизистон, Ўзбекистон вакиллари ҳам таклиф ва мулоҳазалари билан ўртоқлашиб, ҳамкорликда фаолият юритишга тайёр эканликларини маълум қилишди.