Туркистон шаҳри ҳокими Нурбўл Абдисаттарули Турашбековнинг аҳоли билан учрашуви вилоят марказидаги олтита ҳудудий шўъба, яъни, Бирлик, Ясси, Шавгар, Бекзат, Ўтирор ва Саврон кичик туманларида ўтди. Хусусан, доимий фаол жамоатчи обуначимиз, Қозоғистон Республикаси фахрий фуқароси Тойир Абдувалиев раҳбарлик қилаётган Бирлик шўъбасида ўтган йиғилишда 2022 йили шаҳар ҳокимига йўлланган 141та мурожаат ва таклифларнинг 131таси бажарилиб, 7таси бўйича иш олиб борилаётгани таъкидланди. Бирлик шўъбасининг ер майдони 1751,8 гектарни ташкил этади. 2648та хонадонда  20 минг  аҳоли истиқомат қилади. 

Аҳолининг таклифлари инобатга олиниб, 16,4 чақиримни ташкил этадиган 26та кўчага тош тўшалиб, 11,03 чақиримни ташкил этадиган 7та кўча таъмирланди. 35 чақиримдан иборат 33та кўчага  ёруғлик тизими ўрнатилди. Яна 16,65 чақиримни ташкил этадиган 11та кўчага пиёдалар йўлаги  тўшалди. Жамоат транспорти учун саккизта бекат қурилиши давом этмоқда. Шўъбада бешта янги трансформатор ўрнатилди. Ўтган йили Мустақиллик байрами арафасида  орзиқиб кутилган  янги мактаб  биноси ҳам фойдаланишга топширилди. Бирлик  – шаҳардаги  пешқадам шўъбалардан бири.