Элбошимизнинг “Келажакка йўлланма: маънавий янгиланиш” мақоласида ёш авлодга кўп тилни ўргатиш вазифаси юкланган. Айниқса, бу масала мактабгача таълим масканлари учун долзарб. Шимкент шаҳрининг Сайрам даҳасидаги Низомхон Сулаймонов раҳбарлик қиладиган “Жон-болажон” болалар боғчаси шу йўналишда самарали фаолият кўрсатаётган даргоҳдир. 

Яқинда мактаб олди гуруҳи тарбияланувчилари иштирокида “Олтин куз” мавзусида тадбир ўтди. Жажжи болакай ва қизалоқларнинг мустақил хатти-ҳаракатлари, эртак қаҳрамонларининг саволлари ва топишмоқларига уддабуролик билан жавоб топишлари меҳмонларни қувонтирди.

Тадбир руҳига мос равишда безатилган зал бир қарашдаёқ эътиборни жалб этади. Эрталикда иштирок этган ота-оналар ўз фарзандларининг қозоқ, рус ва она тилларида қўшиқ, шеър ижро этиши, турли куйларга рақс тушишини кўриб, қувонишди.

Бу ўринда гуруҳ тарбиячиси Зарина Алимбекова, эртак қаҳрамонлари образларини яратган Дилбар Нишонова(куз), Мунаввар Бойматова (ботқоқ), Светлана Захлеба (ўрмон махлуқи), мусиқа ўқитувчиси Беҳзод Омонхўжаев ҳамда хореограф Наталья Ақжўлтаеваларнинг хизматларини алоҳида таъкидлаш жоиз. 

Тадбир якунида сўз олган болалар боғчасининг услубиятчиси Татьяна Пономарева саховатли куз фасли ҳақидаги сермазмун тадбир ташкилотчиларига миннатдорчилик билдирди.