Ягона миллий тестга тайёргарлик икки йил муқаддам бошланган эди. Келажагимиз, эртанги кунимиз давомчилари бўлган ўқувчи ёшлар айни пайтда олий ўқув юртларига кириб, бирор касбни эгаллаб, етук мутахассис, Ватани, Адолатли Қозоғистоннинг рақобатбардош, адолатпарвар бунёдкорлари бўлиш орзусида устоз-мураббийлардан таълим олишмоқда.

Сайрам туманининг Қорабулоқ, Орис ва Кўлкент қишлоқларида фаолият юритаётган ўзбек тилида таълим берувчи мактаблар 10-синф ўқувчиларининг 151 нафари «Тест билимдони» танловида иштирок этишди. 

Навбатдаги танлов ёшларни миллий тест-синовлардан муваффақиятли ўтишлари учун замин яратди. 

Анъанага кўра, энг яхши уч мактаб ва 10 нафар зукко ўқувчилар аниқланиб, ҳомий – NIK GROUP асосчиси, жамоат арбоби Бадритдин Нишонқулов томонидан тақдим этилган пул мукофотларига сазовор бўлишди.

Бу галги танловда Жамбил номли мактабнинг 5 нафар ўқувчиси муваффақиятли иштирок этиб, дастлабки бешликнинг барча ўринларини забт этишди. 

Танловда иштирок этган 19та мактаб ўртасида Жамбил номли мактаб – 121, «УХУД» – 93, 4-сонли гимназия мактаби – 88 балл билан биринчи учликдан ўрин эгаллашди.

 Навбатдаги танловда барча мактаблар фаол иштироки билан ўқувчилар келажаги учун қайғуришаётганлиги, ёш авлод тақдирига бефарқ эмасликларини намоён этади, деган умиддамиз.