Газетамизнинг аввалги сонларидан бирида вилоят марказида Шаҳар куни кенг кўламда тантанали нишонланганлиги тўғрисида хабар берган эдик. Вилоят ҳокими Ж. Туймебаев, Шимкент шаҳар ҳокими Ғ. Абдирахимов ҳамда эл оғалари, шаҳар фуқаролари, меҳмонлар иштирокида ўтган ушбу тадбирда касб-ҳунар коллеж талабалари, ёш спортчилар ўз ҳунарларини, қобилиятини намойиш этганлиги, отчопарда мусобақалар, Наврўз майдонида ўтган тантанада таниқли санъаткорларнинг байрамга файз киритганлиги тўғрисида қисман хабардор этгандик.
Шу кунги тадбирнинг энг қизғин пайти, юксак даражаси шаҳар ҳокими Ғ. Абдирахимовнинг Шимкент шаҳрининг “Фахрий фуқароси” унвони билан тақдирланган эл оғаларининг елкаларига Фахрий фуқаролик мовий тасмасини ташлаб, гувоҳномасини топшириш тадбири бўлди десам, муболаға эмас. Ҳоким ушбу байрамда тақдирланганларни юксак унвон билан табриклаб, келгуси фаолияти, бунёдкорлик ишлари, кўрсатаётган саҳоватига муваффақиятлар тилаганди.
Шимкент шаҳрининг Фаҳрий фуқароси унвонига сазовор бўлганлар орасида 1990-1991 йиллар мобайнида вилоят партия қўмитаси котиби, вилоят халқ депутатлари ижроия кенгаши раиси лавозимларида жанубни бошқарган Сергей Александрович Терешченконинг борлиги алоҳида мақтовга сазовордир. Сабаби, 1991 йилнинг 5 апрелида илк бор “Жанубий Қозоғистон” собиқ “Дўстлик байроғи” газетасининг дастлабки сони ва саҳифасида таниқли давлат арбоби, партия қўмитаси котиби С. Трешченконинг табрик сўзи билан чоп этилганлигини алоҳида эътироф этиш жоиз.
У янги чоп этилган газетамизнинг келгуси фаолиятида зафарлар тилабгина қолмай, ёш жамоага “Нива” русумли хизмат автомобилини тақдим этганлиги, бу инсоннинг оммавий ахборот воситаларига бўлган ҳурмат ва эҳтиромининг ёрқин далили.
Таъкидлаш жоиз, унинг Қозоғистон Республикаси вазирлар маҳкамаси, олий кенгаш ва Президент девонидаги фаолияти ҳамда Республика бош вазири, кейинчалик “Отан” Республика сиёсий партия раиси, Қозоғистон халқи Ассамблеяси раисининг биринчи ўринбосари лавозимларида олиб борган сермаҳсул фаолияти ҳам таҳсинга лойиқдир.
Бундай шарафли унвонга лойиқ бўлганлар сафида вилоятимизни 1993-1997 йилларда бошқарган Заутбек Қауисбекулининг борлигини алоҳида таъкидлаб ўтиш жоиз. Мустақиллигимизнинг дастлабки йилларидаги мураккаб иқтисодий вазиятни ҳал этишда унинг саъй-ҳаракати сабаб халқимиз оғир вазиятдан соғ-омон чиқди.
З. Турисбековнинг 2007 йилдан 2015 йилнинг ноябрь ойигача Қозоғистон Республикасининг Ўзбекистон, Россия, Молдавия республикаларидаги фавқулодда ва мухтор элчиси лавозимларидаги фаолияти Элбошимиз Н. Назарбаев ҳамда ҳукуматимиз раҳбарлари томонидан муносиб тақдирланганлигининг гувоҳимиз.
Ҳамюртларимиздан Бўлат Жилқишиев 1979-2006 йиллар оралиғида Шимкент шаҳридаги ғишт заводи, “Промстрой материал” қурилиш корхоналарида, Тараз, Кентов, Шимкент шаҳарларининг ҳокими, 2002 йилнинг 31 августида (2006 йилнинг сентябрь ойигача) Жанубий Қозоғистон вилоятида ҳоким лавозимларида фаолият юритди. Элбошимизнинг қўллаб-қувватлаши ва Б. Жилқишиевнинг саъй-ҳаракати туфайли Шимкент шаҳрида янги кичик туманлар, жумладан, “Нурсат”да замонавий лойиҳалар асосида кўп қаватли уй-жой бинолари, маданий-маиший хизмат кўрсатиш муассасалари, вилоят ҳокими биносининг қурилишига асос солинди. Вилоятимизда кичик ва ўрта бизнесни тараққий эттиришга шароит яратилди.
Сатибалди Ибрагимов “Казхром” миллий компанияси президенти, иқтисод фанлари доктори, Қозоғистон Республикаси Парламентининг собиқ депутати, Элбошимиз Н. Назарбаевнинг сафдоши ҳам курсдоши (1959 йил Днепродзержинск шаҳрида бирга таҳсил олишган). Қозоғистон Республикаси саноати ва металлургия соҳасининг тараққиётига салмоқли ҳисса қўшган ташкилотчи раҳбар ва жамоат арбобининг тақдирланганлар сафида борлиги бу мўътабар инсонларнинг меҳнатига берилган баҳо деб билмоғимиз лозим.
Вилоятимизнинг, шу жумладан Шимкент шаҳрининг ижтимоий-иқтисодий, маданий ва бошқа соҳалари ривожига ҳамда хусусий (оилавий) тадбиркорликнинг тараққиётига салмоқли ҳисса қўшган, шимкентлик тадбиркорларнинг саркори, сахий инсон, “Жанубий Қозоғистон” газетасининг доимий ҳомийси ва жонкуяри, ҚР меценати Абдуқаҳҳор Ҳошимўғли Файзаҳмедовнинг ҳам ушбу унвонга сазовор бўлиши барчамиз учун фахр, ғурур эканлигини таъкидлаш жоиз.
А. Файзаҳмедовнинг самарали ва сермаҳсул меҳнати, тадбиркорлик ила иш юритишдаги истеъдоди ва заковати бунёдкорлик соҳасидаги қобилиятининг етуклигини бу инсон томонидан бунёд этилган ажойиб ва афсонавий “Алтин сарой”, “Гавҳар сарой” тантаналар саройлари ҳамда “Нурсат” кичик туманидаги 5 қаватли “Рахима плаза” савдо марказини тилга олишнинг ўзи етарли бўлса керак. Сабаби, тадбиркорликни ўзига касб этган бу комил инсон бирор лойиҳачиларнинг хизматисиз ўзининг шахсий дунёқараши, тафаккури, ўй-фикри билан бундай замон талабига муносиб кошонани бунёд этиш ҳамманинг қўлидан келавермаслигини амалда намоён этди.
Ундан ташқари унинг ёрдамга муҳтожларга ўз вақтида саховат қўлини чўзишга қодир, кўзи очиқ, дили уйғоқ инсон эканлигидан далолатдир. А. Файзаҳмедовнинг саховатпешалиги, меценатлик қобилиятининг юксаклиги хусусида фикр юритар эканмиз “Жастар” тўйхонасини “Тасвирий санъат” саройига бепул туҳфа қилганлиги ногирон ва кам таъминланган оилалар учун бошпана қуриб берганлиги, “Жанубий Қозоғистон” газетасининг ададини оширишда, моддий техника базасини яхшилашда ўзгаларга ўрнак бўлиб, кўп йиллардан буён саховат кўрсатиб келаётганининг ўзи бу мўътабар инсоннинг шарафли номга лойиқ эканлигидан далолатдир.
Тасвирда: тадбирдан лавҳалар.