Астана шаҳридаги мил­­­­лий кутубхонада ўтган Қозоғистон халқи Ассам­блеяси Кенгашининг навбатдаги кенгайтирилган йиғилишида минбарга чиққан бир нечта вазирлик аъзолари “Қозоғистон халқи” интерфаол тарихий харитасини ишлаб чиқиш, “Қозоғистон халқи Ассамблеяси” тўғрисидаги қонунга ўзгаришлар ва қўшимчалар киритиш ҳақида сўз юритдилар. 

Тадбир давомида алмаштириш тартиби билан Қозо­ғистон халқи Ассамблеяси Кен­гаши аъзолари рўйхатига ўзга­ришлар киритилди ҳамда янги (51 нафар) аъзоларнинг рўйхати ўқилди. Таъкидлаш жоизки, элимизнинг тараққиётига, халқнинг бирлиги, тотувлигига улкан ҳисса қўшиб келаётган Қозоғистон ўзбеклари “Дўстлик” ҳамжамиятининг раиси Икромжон Ҳошимжонов Президент Фармонига биноан Рўзақул Холмуродовнинг ўрнига ҚХА Кенгаши аъзоси бўлиб сайланди. 

– Бу мен учун улкан масъулият. Зеро, Ватанимиздаги тотувлик, ҳамжиҳатликни кўз қорачиғидек асраб-авайлаш ҳар биримизнинг муқаддас бурчимиздир. Ана шу эзгу қадриятларни ёш авлод онгига сингдириш, уларни комил инсон этиб тарбиялаш ғоятда муҳим. Бунда  Қозоғистон халқи Ассамблеясининг роли буюк. Халқларнинг бирлиги келажак авлод учун осуда ҳаётни таъминлаш демакдир ва бу йўлда барчамиз фидокорона меҳнат қилишимиз керак. Мен юртимизнинг бугунги тинч осмони ҳамда халқимнинг аҳиллигидан фахрланаман,– деди И. Ҳошимжонов.