«Муваффақиятли бўлишнинг энг асосий, бош омили билим эканини ҳар ким теран тушуниши керак. Ёшларимиз учун устувор мақсадлар қаторида билим ҳар доим биринчи ўринда туриши шарт. Сабаби, қадриятлар тизимида билимни ҳамма нарсадан устун қўядиган миллатгина ютуққа эришади». Элбошимизнинг «Келажакка йўлланма: маънавий янгиланиш» дастурий мақоласидаги ушбу сўзларни дастуриламал деб билган Э. Иззатуллаев номли ўрта мактабда қатор илмий, маданий-маърифий тадбирлар уюштирилмоқда. Шулардан бири – Қозоғистон педагогика академияси раҳбари Ж. Тўлтебай иштирокида «Ўқитувчи меҳнати ва ўқувчининг ижодий фаоллиги – маънавий янгиланишнинг асоси» мавзуидаги вилоят илмий-амалий конференциясидир. 

Анжуманда мактаб ўқувчиларининг ижодий, муаллифлик ишлари асосида тайёрланган илмий лойиҳалар ва буюмлар кўргазмаси намойиш этилиб, устозлар Ш. Абдурашидов, А. Аҳмедов, Ш. Алиакбароваларнинг маърузалари тингланди. Мактабнинг «Билим нури» газетаси 10 ёшга тўлиши муносабати билан бош муҳаррир А. Шерметов ўз маърузасида нашрнинг ўқувчилар заковатини оширишдаги аҳамиятини таъкидлади. 

Анжуман ниҳоясида расмий мукофотлар топширилди. Чунончи, мактаб директори Дадахон Жалилов академиянинг «Фахрий профессор» унвони билан тақдирланиб, бир гуруҳ фаол ўқитувчилар кўкрак нишонларига сазовор бўлдилар.