Қозоғистон Республикаси Президенти Н. А. Назарбаевнинг “Тўртинчи саноат инқилоби шароитларида ривожланишнинг янги имкониятлари” Мактуби мамлакатимизда кенг муҳокама қилинмоқда.
Куни-кеча “Қозоғистон халқи Ассамблеяси” биносида ўзбек этномаданият бирлашмалари Республика “Дўстлик” ҳамжамиятининг ташаббуси билан давлат ва жамоат арбоблари, этномаданият бирлашмалари аъзолари, фаол юртдошларимиз, ёшлар, оммавий ахборот воситалари вакиллари иштирокида йиғилиш бўлиб, унда ушбу муҳим ҳужжат замиридаги қадриятлар тилга олинди.
Йиғилишга “Дўстлик” ҳамжамияти раҳбари Икромжон Ҳошимжонов раислик қилди. У иқтисодий, сиёсий ислоҳотлар, маънавий янгиланишнинг аҳамиятини тилга олиб, уларнинг айнан вақтида амалга оширилаётганини айтди.
Жамоат арбоби Рўзақул Холмуродов ўз сўзида Мактубнинг бандларига изоҳ бериб ўтаркан, замонамизга мос ва хос яшаш, илм олиш заруратига алоҳида эътибор қаратди.
– Янги технологияларни олиб кирадиганлар – одамлар, – деди Р. Холмуродов. – Улар ўз-ўзидан ишламайди. Юқори савияли мутахассислар керак. Мактубда 24 марта “билим“ сўзи такрорланган.
Жамоат арбоби, Қозоғистон Республикаси Парламенти Мажлисининг собиқ депутати Шалатай Мирзахметов кўпроқ Мактубнинг устозлар қадрини кўтаришга қаратилган бандларига эътибор қаратди.
Йиғилишда сўзга чиққан Муратали Қалмуратов ва бошқа нотиқлар ҳам Мактубнинг мазмун-моҳияти хусусида ўз фикр-мулоҳазаларини билдирдилар.
Қозоғистон ўзбек этномаданият бирлашмалари “Дўстлик” ҳамжамияти кенгаши кенгайтирилган йиғилиши қатнашчиларининг Қозоғистон Республикаси Президенти Нурсултан Назарбаевнинг “Тўртинчи саноат инқилоби шароитларида ривожланишнинг янги имкониятлари” Мактуби муҳокамаси ҳамда ундан келиб чиқадиган вазифалар бўйича барча вилоят, туман, шаҳар ва қишлоқлар этномаданият бирлашмалари аъзоларига мурожаати
Ҳурматли ва азиз миллатдошлар!
Муҳтарам Элбошимиз Н. Назарбаев “Тўртинчи саноат инқилоби шароитларида ривожланишнинг янги имкониятлари” деб номланган Мактубида мамлакатимиз саноати, қишлоқ хўжалиги, ижтимоий ва давлат бошқаруви соҳаларини ривожлантиришга доир 10та асосий вазифани батафсил баён қилиб берди.
Мактубда, Қозоғистон жаҳонда турли силсилалардан муносиб ўтиб, ўзининг иқтисодий юксалиш йўлига тушмоқда, 2050 йилга мўлжалланган ривожланиш стратегияси ҳаётга татбиқ этилмоқда, “100 аниқ қадам” Миллат режаси доирасида ислоҳотлар юритилмоқда, маънавий янгиланиш йўналиши бўйича мажмуавий тадбирлар амалга оширилмоқда, дейилган.
Замонавий технологиялар инсоният тараққиёти учун янги имкониятлар яратиши билан бирга таҳдид ва синовларни ҳам юзага келтираётганлиги, шу билан бирга тўртинчи саноат инқилоби даврида мамлакатни ривожланиши учун барча шарт-шароит ва имкониятлар мавжудлиги айтилганди.
Элбошимиз Мактубга доир баёнотида: “...бугун биз барчамиз мана шу 10та вазифани хал қилиш йўлида жипслашмоғимиз, бунинг учун жамиятимиз бирлиги ва тотувлиги лозимлигини алоҳида таъкидлади. Бу барча қозоғистонликларга, шу жумладан миллатдошларимизга ҳам улкан маъсулият юклайди.
Юқорида келтирилган мулоҳазаларни ҳисобга олган ҳолда ҳамжамият кенгашини кенгайтирилган йиғилиши қатнашчилари барча миллатдошларимизга мурожаат қилади:
1. Қозоғистон Республикаси Президенти Н. Назарбаевнинг “Тўртинчи саноат инқилоби шароитларида ривожланишнинг янги имкониятлари” деб номланган Мактубини якдиллик билан қўллаб-қувватлайлик.
2. Мактубда ёритилган Қозоғистон тараққиётига доир 10та вазифани амалга оширишдаги асосий кафолатлардан бири бўлмиш эл тотувлиги ва ҳамжиҳатлигини сақлаш ҳамда мустаҳкамлаш учун барча имкониятларни сафарбар этайлик.
3. 2018 йил “Қозоғистонда Ўзбекистон йили” деб эълон қилиниши икки давлат ўртасида иқтисодий, сиёсий ва маданий алоқаларнинг мустаҳкамланиши учун янги имкониятларга кенг йўл очиб беради. Шуни эътиборга олиб, миллий меросимизга таянган ҳолда тадбирларнинг самарали ўтишига улушимизни қўшайлик.
4. Меҳнат қилишга қодир ҳар бир оила ва фуқаронинг ўзини-ўзи таъминлаши учун зарур имкониятларни рўёбга чиқариб, ундан фойдаланишлари учун уларни қўллаб-қувватлайлик. Миллий меросимизга таянган ҳолда экологик тоза ва сифатли қишлоқ хўжалиги маҳсулотлари етиштириш ва уни қайта ишлашни жонлантириш доимий, ўзига хос белги(бренд)миз бўлишига ўз улушимизни қўшайлик.
5. Шаҳар ва қишлоқларимизни ободонлаштириш ва кўкаламзорлаштириш борасида ҳашар ва шанбаликларни мунтазам уюштириб, унга кенг оммани жалб қилайлик.
6. Қозоғистоннинг келажаги – ёшларга умуминсоний ҳамда миллий қадриятларимизга суянган ҳолда тарбия бериб, уларнинг замон воқелиги ҳамда иқтисодиёт эҳтиёжларига жавоб бера оладиган билим олишлари учун шароит яратиш ишида ота-оналар ва жамоатчилик ролини оширишга жиддий эътибор қаратайлик.
Қозоғистонликларнинг келажаги бўлган қозоқ, рус ва инглиз тилларини эркин ўзлаштиришни юқори савияга кўтарайлик. Миллийлигимиз ва тарихимизнинг пойдевори бўлган она тилимизни сақлаш, уни келажак авлодга муносиб мерос қилиб қолдиришда элимиздаги тилларни ривожлантириш сиёсатини дастуриламал қилиб, лотин алифбосига кўчиш масаласини мутасадди ташкилотлар билан хамкорликда ҳал этилишига эришайлик.
Ўқиш ўзбек тилида олиб бориладиган ҳар бир мактабда миллий чолғу асбоблари тўгараклари бўлиши ва уларни чолғу асбоблари, кутубхоналарни бадиий адабиётлар билан доимий таъминлаш масаласининг 2019 йилгача ҳал этилишини йўлга қўяйлик.
7. Кенг омма иштирокида ўтадиган йиғилишларда қонун устуворлиги мамлакат мулкини талон-торож қилиш, мансабни суиистеъмол қилиш билан боғлиқ жиноятларни олдини олиш бўйича тушунтириш ишларини мунтазам олиб борайлик.
Ҳурматли миллатдошлар!
Қозоғистонимизнинг жаҳондаги пешқадам 30 мамлакат сафига киришида ҳар бир фуқаронинг шахсан ўрни ва иштироки зарур. Шуни эътиборга олган ҳолда вилоятлар, шаҳар, туман ва қишлоқ этномаданият бирлашмалари, миллатимиз вакилларининг ҳар бири билдирилган ишончнинг қадрига етиб, янги давр талабига мос инсон бўлишига, ўзига юклатилган шарафли вазифани муносиб уддалашига ишонамиз.
+ 7(747) 701-50-55
+ 7(747) 701-50-55
