Элбоши Н. Назарбаев Қозоғистон халқига йўллаган Мактубида Ҳукуматга ўқитувчиларнинг ойлик маошини оширишни топширган эди. Шунга мувофиқ, яқинда ҚР Таълим ва фан вазири ўринбосари Бибигул Асилова устозларнинг маоши қандай шаклда ошишини маълум қилди.

Унинг айтишича, 1, 2, 5 ва 7-синф ўқувчиларига дарс берадиган ўқитувчилар маоши жорий йилнинг январь ойидан ошади. 3, 6 ва 8-синф ўқувчиларига дарс берадиган муаллимларнинг маоши эса сентябрь ойидан ошади. Шунингдек, 2019 йилнинг сентябрь ойида 4, 9, 10-синфларга, 2020 йили эса 11-синфларга дарс берадиган педагогларнинг маоши кўтарилади.

Давлат раҳбари Мактубида таъкидланганидек, ойлик маошга қўшиладиган устама мансаб маошининг 30 фоизини ташкил қилади. 

– Масалан, шаҳарда яшайдиган 15 йил меҳнат стажига эга биринчи тоифадаги ўқитувчиларнинг маоши 24 минг тенгега ошса, худди шундай иш стажига эга қишлоқ ўқитувчиларининг маоши 25860 тенгега кўпаяди, – деди вазир ўринбосари.

Шунингдек, ўқитувчиларга қўшимча ҳақ тўлаш тизими ҳам татбиқ этилади. Унда ўқитувчиларнинг билими ва тажрибаси ҳисобга олинади. Тоифа миллий тест орқали берилади. Уларнинг тоифаси тасдиқлангач, маошларининг 20 фоиздан 50 фоизгача ошиши кутилмоқда. 

“Агар 15 йил иш стажига эга биринчи тоифадаги шаҳар ўқитувчиси тест орқали бир поғона юқориласа, унинг устама ҳақи 28 минг тенгени, қишлоқ ўқитувчиси учун 36 минг тенгени ташкил қилади” – деди Б. Асилова.