Бир юз йигирма нафар доимий обуначимиз меҳнат қилаётган, Дилмира Файзиева раҳбарлигидаги А. Югнакий номли мактабда 1346 ўқувчига 152 нафар устоз сифатли билим бериб келмоқда. “Мозийга қайтиб иш кўрмоқ хайрлидур”, деганларидай аввало, билим даргоҳи ўтмишига тўхталиб ўтмоқчиман. Мактаб музейи раҳбари, устоз Мирзараим Палпиев тақдим этган маълумотга кўра, муассаса тарихи ўтган асрнинг ўн саккизинчи йилларига бориб тақалади. 1932 йили қишлоқ марказида мактаб қурилган. Дастлабки битирувчилари 1937 йили етуклик аттестатини олишган. Турли йилларда ушбу даргоҳга Шамат Низомов, Ибодулла Умаров, Ҳабибулла Маннопов, Иса Отажонов, Шокир Жамолиддинов, Майраш Нишонова, Поччахон Дадашевлар раҳбарлик қилишган ҳамда мактабнинг моддий-техника базасини мустаҳкамлаш, билим савиясини оширишга муносиб ҳисса қўшишган.
Бир неча кун муқаддам ушбу даргоҳнинг собиқ директори, нафақадаги маориф аълочиси Майраш Нишонова оламдан ўтди. Оллоҳ марҳумани ўз раҳматига олган бўлсин.
Совет Иттифоқи даврида мактаб «Коммуна» деб аталган. 2000 йили 16 февралда ҚР Ҳукумати қарорига биноан мактаб номи Аҳмад Югнакий деб ўзгартирилди. Бу савобли ишда мактабнинг тарих фани ўқитувчиси Мирзахон Палпиев, ҚР Фанлар академияси академиги Раҳмонқул Бердибойларнинг ҳиссаси мўл бўлди. Профессор Н. Маллаевнинг тарихий китобида Аҳмад Югнакийнинг шу заминда дунёга келганлиги қайд этилади. Онадан туғма кўр туғилган А. Югнакий ижодининг асл нусхалари Истанбул шаҳрида сақланмоқда. Марҳум Поччахон Дадашев раҳбарлиги чоғида мактаб номини тарихий асосда ўзгартиришдек хайрли иш амалга оширилди.
Мактабнинг амалдаги директори Дилмира Файзиева билан суҳбатлашиб, ушбу даргоҳ ютуқларига ҳиссса қўшаётган бир гуруҳ ўқитувчиларни тасвирга олдим. Директор ўринбосарлари Насрулло Абдувоситов, Нурмахан Айтжанов, Шоҳида Ёқубова, Садир Абдувалиев, Ҳайрулло Абдувоситов, Бахтқиз Бердиқулова, Жанар Шўшибаева, ташкилотчи педагог Аймат Аллабергенов, психолог Дониёр Солихонов, ижтимоий педагог Жамшид Шаробиддинов, кичик марказ услубиятчиси Дилдора Ражаббоева, кутубхона мудираси Умида Вафоевалар шулар жумласидан.
Жорий йилнинг дастлабки ойида шаҳар ҳокими Тажибек Мусаев, маслаҳат котиби Ғаппар Сарсенбаев, қишлоқ округи ҳокими Асқар Сарсенбаевлар мактабга ташриф буюриб, «Самұрық қазына» икки миллион тенгелик спорт жиҳозларига ҳомийлик қилганини айтишди. Шаҳар ҳокими Т. Мусаев мактаб жамоасига, унинг раҳбари Д. Файзиевага келажакда ҳам муваффақият чўққиларидан кўринишини тилади. Мактабнинг спортдаги муваффақиятларида жисмоний тарбия фани ўқитувчилари Ёрқин Абдураҳмонов, Зокир Абдуламитов, Мирзаҳмад Палпиев каби қатор устозларнинг ҳиссаси беқиёс.
Директор кабинетида мактабнинг спорт борасида эришган ютуқларини электрон нусхада мутасадди ташкилотларга тавсия этган Руслан Абдуғаффоров, Дайрабай Нурболатлар билан суҳбатлашиб, миннатдорчилик билдирдим.
Мактаб музейининг УВУдаги ғалабанинг 70 йиллигига бағишланган танловда шаҳарда бош соврин ҳамда вилоятда ҳам етакчи бўлгани таҳсинга сазовор. Психолог устозлар Дониёр Солихонов, Салтанат Ўмирбаеваларнинг ташаббуси билан кам таъминланган оилаларга ҳашар йўли билан ёрдам кўрсатиш йўлга қўйилибди. Д. Солихоновнинг доимий изланиши меваси бўлса керак, у пойтахтда ўтган психолог устозларнинг биринчи съездига делегатликка сайланишга муваффақ бўлди. Унинг иш тажрибасини келажакда муштарийларимизга кенгроқ таништириш ниятимиз бор.
2016-2017 ўқув йилида мактаб жамоасининг фаол меҳнати самараси – шаҳар, вилоят, Республика миқёсида ўтказилган фан олимпиадаларида иштирок этган 27 нафар аълочи ўқувчи совринли ўринларга сазовор бўлган. Истеъдодли ўқувчиларнинг фаоллиги туфайли шаҳар, вилоят миқёсида, шунингдек республика ҳарбий-ватанпарварлик йўналишида, ҳамда А. Яссавий ҳаёти ва ижодини ўрганишга бағишланган нуфузли танловда яна 28 нафар ўқувчи олий ва совринли ўринларга сазовор бўлгани диққатга сазовор. “Ижодкор-устоз” йўналишида Интизор Ибодуллаева, Гулмира Романова, Абдуқодир Қаюмов, Дилмурод Аҳмедов, Забира Жусипбекова, Бахитжан Жунаев, Улболсин Аманжўлова, Раъно Юнусова, Саида Абдувоситова, Айнур Ўнгдасинова каби заҳматкаш устозлар ижодий меҳнатлари туфайли турли даражадаги юксак мукофотларга сазовор бўлдилар.
2011 йилдан бошлаб мактабга самарали раҳбарлик қилиб келаётган моҳир ташкилотчи Дилмира Файзиева суҳбат чоғида устозлар жамоасининг аҳиллиги, тотувлиги ҳамда фаоллиги туфайли салмоқли натижаларга эришилаётганини таъкидлади. 1986 йили фойдаланишга берилган мактаб биноси 2013 йили капитал таъмирдан ўтказилган. Устозлар жамоасининг саъй-ҳаракатлари билан математика, география, кимё, биология майдонлари яратилди. Мактаб мажлислар зали қайта жиҳозланди. ЯМТ кўрсаткичи 68 баллдан 70дан зиёдга кўтарилди. Ўтган ўқув йилида жами 63 битирувчидан 22 нафари давлат гранти асосида республикамиз олий ўқув юртларида бепул таълим олаётгани заҳматкаш устозлар меҳнатининг маҳсулидир.
Мактаб қошидаги кичик марказда 250 нафар жажжи болакай тарбияланмоқда.
Олдинда турган вазифалар кўламдор. Мактабда кимё, физика мультимедия кабинетларини ташкил қилиш, интерфаол тахта таъминотига эришиш каби масалалар ечимини кутмоқда. Бу ҳақда мутасадди ташкилотларга ёзма равишда мурожаат этилган.
Мактаб ёнидаги собиқ директор, марҳум Поччахон Дадашев ташкилотчилигида меҳнати барпо этилган боғ ҳосилга кирган. Маориф соҳасида қатор давлат мукофотларига сазовор бўлган Дилмира Файзиева муваффақиятлари замирида ҳар бир ўқитувчи, ходим, ўқувчи ва ота-оналарнинг заҳматли меҳнати ётганини таъкидлаб, келажакда ҳам Элбошимиз Н. Назарбаевнинг турли давлат ҳужжатларида қайд этган асосий мақсади – тотувлик, бирлик, ҳамжиҳатлик орқали мукаммал билим, онгли тарбияга эришишига ишонч билдирди.