Қозоғистон Републикаси ўзбек этномаданият бирлашмалари “Дўстлик” ҳамжамияти кенгаш аъзоларининг навбатдаги мажлисида Астана шаҳрининг 20 йиллиги муносабати билан ташкиллаштириладиган тадбирлар муҳокама қилинди. 

6 июлда Астана шаҳрида уюштириладиган тадбир чоғида концерт дастури намойиш этилиб, астаналикларга асосий совға сифатида ҳамжамиятнинг республикамиз барча вилоятларидаги бирлашмалари ҳамжиҳатлигида 20та қозонда, ҳар бирида 20 килодан ўзбек миллий ошхонасининг энг тансиқ таоми, халқимиз меҳмондўстлиги ва бағрикенглиги ифодаси, дастурхонимиз кўрки – палов улашишга келишилди. 

Таом шу билан бирга, Астана шаҳридаги ижтимоий муассасаларга ҳам таратиладиган бўлди. Бу борада ишларни юритиш учун 5 кишидан иборат ишчи гуруҳи тузилиб, олдинда амалга ошириладиган ишларнинг режаси аниқланди. Таъкидлаш жоизки, Туркистон вилоятидаги йирик этномаданият бирлашмалари қаторида Сайрам тумани, Туркистон шаҳри ва Шимкентдаги туманлар томонидан ҳам тортиқ сифатида қозонлар қўйиладиган бўлди.

Таъкидлаш жоизки, ЮНЕСКО қўмитасининг 11-сессиясида “Палов маданияти ва анъаналари” инсониятнинг номоддий маданий мероси сифатида рўйхатга киритилган. Бу халқимиз бой маданиятининг халқаро миқёсдаги яна бир эътирофидир.

Мазкур табдирда барча ҳохловчилар иштирок этишлари мумкин.