Ўтган йили вилоятда 78 810 чақалоқ дунёга келди. Бинобарин, расмий органларнинг статистика маълумотларига кўра, ўйланадиган ҳолатлар ҳам бор, шекилли. Сабаби, 2016 йили вилоятда 84 398 бола дунёга келганди. Ўтган йили эса туғилиш кўрсаткичи 2016 йил билан таққослаганда тахминан 6,6 фоизга ёки 5 588 болага камайган.
Туғилганлар сони бир йили кўпайиб, бир йили камайса, биз бунга эътибор бермасдик. Бироқ, 2003 йили вилоятда 51 мингдан зиёд бола туғилган экан. 2013 йили вилоятда туғилган чақалоқлар сони 78 162га етиб, 10 йилда 1,5 марта ортган. 2014 йили эса – 78 961, 2015 – 79 125 чақалоқ дунёга келган. Яъни, вилоятдаги бола туғилиш кўрсаткичи сўнгги 13 йил давомида ўсиб келган. Фақат ўтган йили камайган.
Бироқ шунинг ўзида вилоят аҳолисининг табиий ўсими 64 097 одамни ташкил этади. Шундай қилиб, вилоятдан бошқа минтақаларга кўчиб кетганлар кўп бўлишига қарамасдан, ўтган йили жанубийқозоғистонликлар қатори 44 мингга кўпайган. Бола туғилиш кўрстакичи бўйича бизнинг вилоят Манғистов, Атиров ва Қизилўрда вилоятлари билан бирга олдинги қаторларда. Ушбу тўрт минтақада минг одамга чаққанда йилига 28-29 боладан туғилмоқда. Бу – минг одамга 15 боладан туғиладиган Қўстанай ва Шимолий Қозоғистон вилоятларига қараганда анча юқори кўрсаткич.
ҚР Миллий иқтисод вазирлиги Статистика қўмитаси 2019 йил ноябрь ойида элимизда умуммиллий рўйхат ўтказилишини эълон қилди. Ҳозирги кунда мамлакат раҳбарияти ушбу катта тадбирга қизғин тайёргарлик кўрмоқда. Бу рўйхатда халқни қизиқтирадиган асосий иккита савол бор: Бири “Қозоғистон аҳолиси сони қанча?” бўлса, иккинчиси “Ундаги қозоқлар улуши қанча?” деган. Сабаби, 2009 йилги рўйхат вақтида уюшган жиноятчиликка қарши шов-шув чиққани кўпчиликнинг эсида. Устига-устак аввалги натижалар тафтиш қилиниб, элимиздаги қозоқлар сони 67 фоиздан 64 фоизга камайганди. Энди бугунги кунда айрим демографлар қозоқлар сони 70 фоизга етган дейишмоқда. Мустақиллик тарихидаги учинчи рўйхатда бу сўзнинг қанчалик рост экани аниқланади.
Қозоқнинг табиий кўпайишидан сиёсий сабаб излайдиганлар ҳам топилади. Сўнгги вақтда маҳаллий русийзабон матбуотда ҳамда турли сайтларда “энди 10 йилдан кейин элимиздаги қозоқларнинг улуши 90 фоизга етади ва Қозоғистон кўп миллатли давлатга айланади” деган башоратлар айтилмоқда. Бу – бўлмаган гап.
Ҳа, сўнгги йилларда Қозоғистондан Россияга кўчиб кетаётганлар сони бироз кўпайди. Статистика маълумотларига кўра, ўтган йили Қозоғистондан 28 мингга яқин одам кўчганини ҳамда 21 мингга яқини Россияга бутунлай кўчиб кетганини кўрсатмоқда. Ушбу маълумотларни тарқатишдан мақсад номаълум таҳлилчилар кўчишни Қозоғистондаги иқтисодий беқарорлик, элдаги таълим сифатининг пасайиши билан, унданда ёмони, миллатчиликнинг авж олаётганлиги билан тушунтирилмоқда. Сталин давридаги қатағон йилларида депортация қилинган этносларнинг барчасига қучоғини очиб, бир бурда нонини бўлиб берган қозоқнинг бугунги авлоди ўта миллатчи бўлиб кетди деганга ҳеч ким ишонмайди. Элимиздаги миллий сиёсатнинг ҳам асосий йўналиши – миллатлараро тотувликни таъминлаш. Шунингдек, рус тили кучини йўқотмаган Қозоғистонда биров русларни четлатяпти, деган гапнинг ўзи ақлга сиғмайди.
Русларнинг Россияга кўчиши – ҳеч қандай сиёсий ёки миллатчилар тазйиқи ёки иқтисодий инқироз оқибатидан эмас. Одамларнинг тарихий Ватанига қайтиши – табиий содир бўладиган тарихий жараён. Эмиграцияга эса турли омиллар таъсир қилиши мумкин. Ҳозир кетаётганларнинг кўпчилиги бундан чорак аср илгари кўчишни ўйлаб қўйган бўлиши мумкин. Фақат уларни кўчишга имконияти бўлмаган ёки Қозоғистондаги қари ота-онасига қараб қолган бўлиши мумкин. Энди имкони борида ўз тарихий Ватанига қайтса, бу – уларнинг ихтиёри. Бундан сиёсий сабаб излаш тўғримас.
Кейин расмий далиллар республикадаги рус миллатининг сони 3 миллион 618 минг эканини кўрсатиб турибди. Демак, йилига 20 минг одам кўчганлиги сабабли уларнинг сони бирдан камайиб кетади дейишга бўлмайди.
Бундан ташқари, 1991 йили элимиздаги қозоқлар сони 7 миллионга етмасди, ҳозир эса 12 миллиондан ошди. Давлат тузувчи миллатнинг улуши Қизилўрда вилоятида 95 фоизга, Манғистов ва Атировда 90 фоизга етган. Агар элимиз мустақиллик йилларида фақат 6та вилоятда 50 фоиздан ошган бўлса, ҳозир 13та минтақада қозоқлар бутун аҳолининг ярмидан кўпроғини ташкил этади. Мустақиллик йилларида қозоқларнинг сони барча минтақаларда, шунингдек, шарқ, марказий ва шимолий вилоятларда ҳам кўпайди. Статистика қўмитасининг 2017 йил бошидаги расмий далиллар бўйича, мамлакатимиздаги аҳоли сони 17 миллион 918 мингдан ошганини, қозоқ миллатининг сони эса 12 миллион 1 мингга етганини маълум қилди.
2012 йил сўнггида 11 миллионинчи қозоқнинг Жанубий Қозоғистон вилояти Қазиғурт туманида дунёга келгани кўпчиликнинг ёдида бўлса керак. 2016 йилнинг сўнггидаги далиллар қондошларимизнинг сони 12 миллионга етганини кўрсатмоқда. Яъни, республика аҳолисининг сони 3 йилда бир миллионга кўпайса, қозоқларнинг сони тўрт йилда бир миллионга ортган. Бу тахминларни мутлақ сонларга айлантирган пайтда қозоқларнинг сони келгуси 10 йилда ҳам, 20 йилда ҳам саксон фоизга етмаслигини биламиз. Демограф мутахассислар элимиздаги ҳозирги аҳоли сонининг ўсиш тенденцияси сақланса, эндиги ўн йилликда қозоқ халқининг улуши 72-73 фоиз атрофида бўлишини тахмин қилади. Бундан ташқари, давлат тузувчи миллатнинг ҳиссаси ортгани билан, бизнинг элда миллатлараро тотувлик ва келишув ўз моҳиятини ҳеч қачон йўқотмайди. Бу – Қозоғистон жамиятининг ҳамма учун бирдай қадрияти бўлиб қолади.
Тарихий далилларга кўра, Қозоғистон аҳолиси кўпайишининг энг яхши кўрсаткичлари 1953-1964 йиллари рўйхатга олинган. Биринчидан, шу йиллари ҳар бири ўн болани дунёга келтирган қаҳрамон оналаримизнинг жасорати туфайли, иккинчидан, қўриқ ерларни ўзлаштириш учун келган этнос вакилларининг кўпайиши туфайли шу вақтда элимиздаги аҳоли сони 7,1 миллиондан 11,7 миллионгача кўпайибди. Яъни, йил сайин аҳоли сони 3,5-4,2 фоизга кўпайган. Бу кўрсаткичлар етмишинчи йиллари 2,5 фоизга кўтарилиб, саксонинчи йиллар бошида 1,5 фоизга тушган. Ўтган асрнинг тўқсонинчи йилларида эса, аҳолининг табиий ўсими пасайиб, элдан кўчиб кетган европалик этнос вакилларининг ҳисобига элимиздаги туғилиш кўрсаткичи фақат 2002 йилдан қайта тиклана бошлаган. Масалан, республикада 2002 йили 227 минг бола туғилса, 2016 йили бу кўрсаткич 416 мингга ўсган. Ўтган йили эса 405 минг болани ташкил этган. Яъни, ўтган йили Қозоғистон аҳолисининг сони 1,55 фоизга кўпайиб, шу ҳисоб бўйича 1987 йил даражасига қайта кўтарилдик.
Демограф мутахассислар сўнгги 10 йилда Қозоғистонда туғилиш кўрсаткичининг ортишини ўтган асрнинг саксонинчи йили туғилган болаларнинг (сўнгги 10 йилда улар ота-она бўлишди) кўп бўлгани билан боғлиқлигини айтишмоқда. Бу ерда мантиқ оддий: кўп ота-онадан кўпроқ бола туғилади. Агар бу далил тўғри бўлса, келажакда элимизда бола туғилиш кўрсаткичининг ўсими сусайиб, йил сайин туғиладиган болалар сони барқарорлашади ёки сал камайиши ҳам мумкин. Чунки, бундан буён ер юзида авлод кўпайтирадиган ёшдаги ота-оналар орасида тўқсонинчи йиллари туғилганларнинг ҳиссаси ортиб боради. Улар эса, саксонинчи йилгилардай кўп эмас. Ўтган йили вилоятда бола туғилиш кўрсаткичининг 6,6 фоизга камайиши шу сабаблар билан боғлиқми, йўқми? Ижтимоий-демографик таҳлиллар юритмай туриб, бу саволга аниқ жавоб бериш мумкин эмас.
Асли қозоқ ўз оиласидаги бола сонини айтавермайди. Айтганни ёқтирмайди. Катталардан боласининг сонини сўрасанг “Оллоҳнинг бергани бор”, деб силлиқлаб ўтиб кетади. Бундай жамиятда энди туғиладиган болалар сони тўғрисида башорат қилиш обрўмизга тўғри келмаслигини биламиз. Лекин, ҳозир Қозоғистон аҳолисининг ўртача ёши жуда ёш, аҳолининг учдан бирини ёшлар ташкил этади. 15 ёшга тўлмаганларнинг эса ҳиссаси бутун аҳолининг 21,6 фоизига тенг. Сўнгги 10 йил давомида йил сайин 380-415 минг оралиғида бола туғилишини инобатга олсак, шу болалар ота-она бўлган вақтда, яъни, 2030 йилдан сўнг демографик ривожланишнинг янги босқичи бошланиш эҳтимоли бор. Юқоридаги кўрсаткичлар илмда “демографик юклама коэффициенти” деб аталади ҳамда у аҳолининг кўпайишига бевосита таъсир қилади.
“Кўринган тоғнинг узоқлиги йўқ” деганларидек, халқимизга 2030 йил ҳам узоқ эмас. Бироқ, бу умид ҳақиқатга айланиши учун авлодга тўғри тарбия бера билишимиз шарт. Бугунги ўйин боласини эртага бир хонадон эгаси бўлиб, ота бўлишдан қочадиган масъулиятсиз, ҳозирги кичкина қизни эса эртага туққан боласини ахлатга ташлаб қочадиган “какку” қилиб вояга етказсак, келажакдан қандай умид кутамиз?..
Демак, авлоднинг фақат сонига эмас, унинг билимига, онггига, тарбиясига, умуман, сифатига алоҳида эътибор беришимиз керак экан.