1765 йили Англияда Джеймс Харгривс “Дженни” йигирув машинасини ўйлаб топди. У 5 нафар йигирувчининг ўрнини боса оларди. Мана, шундан буён одамзод тараққиётида ишчини ишлаб чиқаришнинг кўплаб соҳаларидан чеккага суриб қўядиган машина, аппаратлар ихтиро қилинди. Энди навбат – роботларда.
Генри Форд ХХ асрда транспорт ишлаб чиқаришни ёппасига конвейерга ўтказгач, заводда одам ва техниканинг рақобати кучайди. Бироқ 1970 йилгача дунёнинг йирик корхоналарида одамнинг улуши кўп бўлди. Масалан, Женерал Моторс, Форд Моторсларда 595 минг ҳамда 260 минг киши меҳнат қилди. Совет Иттифоқининг алп комбинатларида ҳам ўн минглаб ишчилар бор эди. Бинобарин, 1990 йилда дунёвий индустрияда аутсорсинг (outsourcing) жараёни бошланди. Йирик компаниялар ўз корхоналарини ривожланаётган мамлакатларга кўчирди. Сабаби, уларда ишчи кучи арзон, шунингдек, маҳаллий хомашё ҳам топиш мумкин эди. Ана шундай қилиб, Хитой, Вьетнам, Малайзия ҳамда бошқа Осиё мамлакатларида ички индустрия ривожлана бошлади.
Аутсорсинг. Бироқ уларга товар қийматининг энг кам миқдори тўланарди. Масалан, вақтида битта iPhone 3G смартфони 500 АҚШ долларига сотилди. Унинг харажати 179 доллар бўлса, тоза фойда 321 доллар эди. Шундай смартфоннинг ҳар биридан Хитойга 6,5 доллар қолса, Японияга 50 долларга яқин қоларди. Яъни, мана шу ҳисоб-китобданоқ мутахассисларга баҳо бериш мумкин. Умуман, завод, фабрикаларни аутсорсингга чиқариш кўплаб дунё брендларининг харажатини камайтирди. Аммо, ривожланган мамлакатлардаги иш ўринларининг ёпилишига олиб келди.
Чунончи, фақат АҚШда заводларнинг ривожланаётган мамлакатларга кўчиши муносабати билан 2003 йили 140 минг иш ўрини ёпилди. Ривожланган мамлакатларнинг ҳукуматлари ўзининг миллионлаб аҳолисини иш билан таъминлаш учун аутсорсинг билан келган сармоядорларга шароитлар яратиб берди.
Аутсорсинг билан бир қаторда ниашоринг(nearshoring) жараёни ҳам қатор юрди. Яъни, юқори технологияли ишлаб чиқариш ривожланган давлатлардан узоққа эмас, яқиндаги қўшни мамлакатга кўчади. Масалан, АҚШдаги автоиндустрия алплари машинани яқинидаги Мексикада ясай бошлади. Натижада, Мексика йилига 3,6 млн. дона транспорт ишлаб чиқарадиган давлатга айланди. Ёки Ғарбий Европанинг йирик компаниялари социалистик қуршовдан чиққан Жанубий Европани ишғол қила бошлади. Бу самарали эди: маданияти ўхшаш, ишчи кучи арзон, малакали кадрлар кўп.
Решоринг. Бинобарин, 2010 йилдан аҳвол тубдан ўзгарди ва решоринг (reshoring) жараёни бошланди. Йирик компаниялар ишлаб чиқариш корхоналарини ўз давлатларига ёки ривожланган мамлакатларга қайтаришга тушди. Нега? Бунинг бир неча сабаблари бор. Биринчидан, ҳозир ривожланаётган мамлакатлардаги ишчи кучи 20 йил аввалгидек арзон эмас. Улар ҳам юқори маош, ижтимоий пакетни талаб қила бошлади. Харажат ортди. Иккинчидан, ишлаб чиқаришни элга қайтариш учун ривожланган мамлакатларда компаниялар солиғи камайтирилиб, шароитлар яратила бошлади. Учинчидан, ишлаб чиқаришни роботлаштиришга киришилди. Аввалгидек заводда минглаб ишчи ишлаши шарт эмас.
Элга қайтиш? Роботни бошқарадиган саноқли ишчини қудратли давлатдан ҳам топиш қийин эмас. Масалан, Тайваннинг Foxconn компанияси 10 млрд. доллар турадиган йирик заводни Чикагода қурмоқчи. 3 минг иш ўрини очилади. “Мерседес” АҚШнинг Алабама штатида қиймати 1 млрд. долларлик автозавод қурмоқчи. Унга 600 нафаргина ишчи керак, холос. Енгил саноат ҳам булардан қоладиган эмас. “Адидас” компанияси 2015 йилда ишлаб чиқаришини Германиядаги Ансбах шаҳрига олиб келди. SpeedFaktory заводи йилига 500 минг жуфт пойафзал чиқаради. Бироқ бу ерда бор-йўғи 160 киши меҳнат қилади. Сабаби, ишлаб чиқариш жараёни тўлиқ автоматлаштирилган.
Бундан ташқари, йирик компанияларнинг юқори технологияни ривожланаётган мамлакатлар билан баҳам кўргиси келмаслиги сезилади. Бироқ, асосий масала харажатга бориб тақалади. Чунки, тадбиркор энг аввал жамиятни иш билан таъминлашни эмас, ўз харажатларини камайтиришни ўйлайди. Биргина мисол – “Ford” компанияси Мексиканинг Сан-Луис-Потоси минтақасида қиймати 1,6 млрд. долларга тенг заводни қурмайдиган бўлди. Унинг ўрнига АҚШнинг Мичиган штатида 700 млн. долларга янги завод очилади ҳамда унга 700 нафаргина ходим керак. Бу жараён бироз Осиё компанияларининг АҚШга кўчишига туртки бўлмоқда. Хитойнинг Tianyuan Garments компанияси АҚШнинг Арканзас штатида йилига 23 млн. эркаклар кўйлаги чиқарадиган фабрика очмоқчи. Шундай йирик ишлаб чиқариш учун уларга бор-йўғи 400 киши керак. Сабаби, кўйлакни тикиш жараёни тўлиқ роботлаштирилган.
Роботлар. Ўзингиз гувоҳ бўлаётганингиздек, ривожланган мамлакатларга оддий заводлар кўчиб бораётгани йўқ. Роботлаштирилган ҳамда кам ишчи талаб қиладиган корхоналар. Компаниялар ўз соҳасига роботларни ўзлаштиришга нега хумор? Сўнгги 20 йилда АҚШда транспорт чиқаришни автоматлаштириш натижасида маҳсулот 53 фоизга ортган, ишчи кучи эса 28 фоизга камайган. Яъни, роботларнинг иш унумдорлиги юқори. Кам харажат билан катта натижага эришиш мумкин. Улар харажатни камайтиради. Робот оғримайди, ишга кечикиб қолмайди ёки сўраниб кетмайди, хатога йўл қўймайди, фақат берилган буйруқни бажаради. Маош, ижтимоий пакет, бир ойлик меҳнат таътили сўрамайди. Иш берувчига энг керакли ходим каби. Хўш, компаниялар роботларни соҳаларига нима учун киритмоқчи?
Робот хатарлими? Албатта, иқтисодиётни роботлаштиришнинг хатарлари ҳам оз эмас. Одатда, бир робот уч кишининг ишини бажарар экан, бу уч ходим ишсиз қолди, деган сўз. Масалан, Буюкбританияда роботлаштириш натижасида 800 минг иш ўрини ёпилган. Эвазига 3,5 млн. янги иш ўрини очилибди. Фақат бу ўринларга қобилиятли, юқори малакали мутахассислар керак. Машҳур “Why nations fail” китобининг муаллифи Д. Асем ўғли ҳамда Рестрепонинг тадқиқотларига таянсак, ишлаб чиқаришни роботлаштирганда ўрта маълумотли мутахассис ишидан айрилиб, маоши камаяр экан. Сабаби, одатда роботлар катта ақлни талаб қилмайдиган, кундаликда такрорланадиган механик ҳаракатларни бажаради. Масалан, қутиларни тўплаш, ташиш, транспортнинг қўшимча қисмларини ўрнатиш ва ҳоказолар.
Россиялик олимлар ҳам ўз иқтисодиёти бўйича таҳлиллар олиб бориб, роботлаштириш жараёни бошланса, меҳнат бозоридаги 49-50 фоиз фуқаро (42 млн.) ишсиз қолиши мумкин, дейди. Сабаби, Россияда бугунги кунгача анъанавий хизмат кўрсатадиган мутахассислар оз эмас. Айтайлик, дўкон сотувчиси, такси ҳайдовчиси, насия таҳлилчиси, риэлтор ва бошқалар. Уларнинг ишларини келажакда автоматлаштириш ёки сунъий интеллект орқали сайтларга алмаштириш мумкин.
Робот – имкониятми? Умуман олганда, Бутунжаҳон иқтисодий форумида 2022 йилгача роботлар одамлардан 75 миллион ишни “тортиб олиб”, 133 миллион янги иш ўринларини очади, деб тахмин қилинди. Бу иқтисодиёти бир соҳага мослашган эллар учун хавфли. Масалан, Бангладеш экспортининг 70 фоизи кийим. Агар шу элдаги тадбиркорлар фабрикаларига оммавий тарзда роботларни ўрнатса, унда миллионлаб кишилар кўчада қолиши турган гап. Энди эҳтиёжда технология билан, катта маълумотлар билан ишлай оладиган data-таҳлилчилар, дастурловчи-муҳандислар, электрон савдо ходимлари, SММчилар бўлиши мумкин.
Умуман, роботлаштириш, сунъий заковат бизнеснинг турларини ҳам ўзгартириб юборди. Мутахассисликларнинг йўқ бўлиши, янги қобилиятли хизматчиларнинг талаб этилиши шунинг оқибатидан. Масалан, биронта шахсий машинага эга бўлмаган Uber дунёдаги энг йирик йўловчи ташийдиган компанияга айланди. Ўз номида на уйи ёки на меҳмонхонаси бўлган Airbnb ёки Booking ҳозир дунё бўйича аҳолини бошпанага жойлаштирувчи энг йирик компаниялардан бири. Яъни, технология бозорни ўзгартирди, мижоз ва бизнес орасидаги даллоллар камайиб бормоқда.
Шунинг бир далили – сайёҳлик агентликлари. Одамлар саёҳат учун авваллари агентликларга мурожаат қилса, ҳозир барчасини уйдан чиқмай, сайт орқали расмийлаштиради. Масалан, АҚШда 1990 йили 132 минг сайёҳлик компанияси мавжуд бўлса, 2014 йили уларнинг сони 74 мингга тушиб қолган. Бошқача айтганда, туристик агентликнинг идорасини излаб, чипта олувчилар сони камайган.
Сўнгги 20 йилда Ғарбий Европа ва АҚШда роботлар сони 5 баравар ортиб, 1,5 млн.га етган. Бугунги кунда дунёда ўз иқтисодиётига роботларни жорий этишда Жанубий Корея, Сингапур, Германия олдинда бормоқда. Фақат Кореяда 10 минг ишчига чаққанда, 631 роботдан тўғри келади. Бироқ мана шу икки давлатнинг кўрсаткичига қарасак, ишсизлик паст даражада. Чунки, роботлаштириш иқтисодиёт ва маошнинг ўсишига олиб келар экан. Шунингдек, ўрта билимли ходимлар қисқартирилиб, қобилияти юқори мутахассисларга эҳтиёж ортади. Агар роботнинг “дастидан” кўчада қолган ўрта малакали мутахассис қайта ўқитилса, қобилияти чархланса, унда ишсизликнинг олдини олиш мумкин.
3D принтер. Умуман, тўртинчи саноат инқилоби даврида технологик тараққиётнинг бир кўрсаткичи ҳамда иш ўринларининг қисқаришига сабаб бўладиган омил – 3D принтерлар. Бугунги кунда улар қадимги қўғирчоқдан бошлаб самолётнинг эҳтиёт қисмигача босиб чиқара олади. Полимер пластикдан исталган шаклни қуйиб беради. Агар ушбу йўналиш яхши ривожланса, унда келажакда, айтайлик, бир машина ясашга керакли деталь, қисмларни 20-30та заводга буюртма беришнинг ҳожати йўқ. Асосий қисмини ҳар автозаводнинг ўзи 3D принтерларда босиб чиқара олади. Масалан, Адидас компанияси 2015 йили Берлинда ҳар қандай одамнинг оёғини сканерлаб, спорт оёқ кийимининг исталган дизайнини танлаб, уни 3D принтерда босиб чиқарадиган дўкон очди. Бизнес, шу тарзда ялпи товар чиқаришдан алоҳида, ҳар бир одамга мўлжалланган, бежирим маҳсулот деган шаклга алмашиши мумкин. Бу мендаги кўйлак бошқа ҳеч кимда бўлмаслиги керак, деб ўйлайдиган қизлар учун яхши имконият.
Қозоғистон-чи? Бутун дунёда шундай технологик, индустриявий ўзгаришлар юз бераётганда, Қозоғистон улардан четда қолмаслиги аниқ. Ўтган йили Меҳнат ҳамда аҳолини ижтимоий муҳофаза қилиш вазирининг ўринбосари Нуржан Алтаев мамлакатдаги 600 компания рақамлаштириш жараёни доирасида бир қанча иш ўринларини қисқартириши мумкинлигини айтди. “Байтерек” холдингига қарашли “Қазына Капитал Менеджмент” компанияси 2017 йили “Вист Групп” компаниясига маблағ қуйган эди. Мақсад – тоғ-кон саноати соҳасини роботлаштириш. Бу, биринчидан, технологиянинг ривожланиши, иккинчидан, иш билан таъминлаш соҳаси учун катта синов. Масалан, Арселлор Миталл Темиртау, “Қазақмыс” каби йирик компанияларда ишчилар сони 30-40 минг орасида. Агар келажакда тоғ-кон саноати, металлургия соҳасида роботлаштириш, автоматлаштириш жараёни бошланса, унда минглаб одамларнинг қора кучи керак бўлмай қолади. Яъни, улар кўчада қолади. Ҳукумат бу компанияларнинг раҳбарларидан ишчиларни ишдан бўшатма, деб ҳадеб сўранавермайди. Жараён давом этмоқда. Шунинг учун Миллий иқтисодиёт ва Меҳнат ҳамда аҳолини ижтимоий муҳофаза қилиш вазирликларининг ундай таваккалларга жавоб қадамлари бор деган умиддаман. Агар ундай бўлмай, ишчилар ишсиз қолса, Марказий Қозоғистоннинг ижтимоий беқарор минтақага айланиши обдон мумкин.
Иқтисодиётни роботлаштириш технологик жараённинг бир босқичигина. Дастлабки ишлаб чиқариш инқилоблари даврида ҳам одам технология ҳамда иш ўрини учун курашди. Натижада, унум ортиб, иккала томон бир-бирига яхшигина мувозанатлашди. Корея ва Германиянинг тажрибаси кўрсатганидек, ишлаб чиқаришни роботлаштиришдан чўчишнинг ҳожати йўқ. Робот саноатдаги бир қанча жараёнларни одамсиз тез бажара олади. Фақат шароитга мослашиб, ишсиз қолганларни янги мутахассислик, йўналиш, қизиқиш-қобилиятига қараб ўқитиш керак. Шунингдек, ҳар бир мутахассис ҳам эртага мени робот алмаштирмайдими, меҳнат бозорида, ўз соҳамда керакли бўлишим учун нима қилишим керак, қандай билим, иқтидорга эга бўлишим лозим, деган саволни ўзига бериб, жавобини топгани маъқул.