Бизнинг маълумот:
Абдраманова Элвира Турсунали қизи, 1978 йили туғилган. Маълумоти олий. Мактабни тугатгач, М. Ауезов номли ЖҚДУнинг “Божхона иши” факультетини тамомлаган. Илк меҳнат фаолиятини мутахассислиги бўйича бошлаган. Бундан 5 йил муқаддам Россия божхона акедемиясини, сўнг магистратурасини тугатди.
Майор. Бугунги кунда Давлат даромадлари департаменти божхона бўлимининг шаҳар божхона-расмийлаштириш марказида етакчи мутахассис. Ёлғиз қизи Алматидаги Тиббиёт академиясида таҳсил олади.
Кўҳна мозийни йилқисиз тасаввур қилиш қийин. Аниқроғи, не-не қирғинларни бағрига босиб ётган ўтмиш саҳифаларида кўплаб жаҳонгирлар қаторида тарих мулкига айланган отлар изи бор. Ҳазрати Муҳаммад (с.а.в.) Буроқ, халифа Али Дулдул, дунёни забт айлаган Искандар эса Буцефал каби арғумоқлари билан эсланади. Йилқичилик тарихи тадқиқини ушбу қадимий отлар силсиласида таҳлил қилганда кўз олдимизда кўҳна дунё йилқичилиги намоён бўлади. Яъни Буцефалу Буроқлар тимсолида араб ва фриз отларининг ўтмиш қаърига сингиб кетган наслчилиги намоён бўлади. Ҳар икки тарихий зотнинг нечоғлик қадимий эканлигини далиллайди. Соҳибқирон Амир Темурнинг қадрдони ҳисобланмиш Ўғлон қорабайири ҳам шулар сирасидан, десак янглишмаймиз.
Ўқувчилик йилларимизда талашиб-тортишиб ўқиган китобларимиздаги қаҳрамонлар, ривоятлардаги тимсоллар орқали биз идеал сиймони тасаввур қиламиз. Ёдингиздами, Алпомишнинг Бойчибори, Гўрўғлининг Ғироти... Алп полвонларни кўз олдимизга келтирарканмиз, албатта, уларни тулпорларисиз тасаввур қилиш қийин. Полвонларнинг камини йилқилари тўлдириб турадигандек гўё ...
Энди замонамизга қайтсакда, Алпомишнинг издошлари ҳақида қалам тебратсак, ҳаётларини йилқисиз, қолаверса, кўпкарисиз тасаввур қилолмайдиган чапдаст чавандоз довруғини достон қилсак.
Сиз ҳеч аёл-чавандозни кўрганмисиз? Айниқса, бугунги кунимизда. Чавандозлик ҳадисини олган аёл билан учрашиш, қолаверса, улоқчи отлар парваришининг сиру асрорлари билан танишиш мақсадида дам олиш кунларининг бирида Тўлебий туманининг Кўксаёқ қишлоғига отландик. Қиш куни эмасми, об-ҳавонинг салқинлиги тоғли ҳудуд иқлимига муштарак келгани учун, этни бироз жунжиктирсада, ёқимли эди. Излаган Маккани топибди, деганларидек, от боқиладиган хусусий фермага кириб бордик. Қаршимиздан келаётган жувоннинг юришидан чайирлиги сезилиб турарди. Истараси иссиқ аёлнинг қарашларидан камтарлик, тортинчоқлик, ўзига хос бир нафосатни пайқаш мумкин эди.
Суҳбатимиз тезгина қовушиб кетди, орадаги бегоналик бироз чекинди. Уни мароқ билан тингларканман, дилкашгина суҳбатдошимнинг тўлиб-тошиб сўзлашларидан дилим яйради.
– Аслида бизнинг авлодда машҳур чавандозлар йўқ, – гап бошлади у. – Ёшлигимдан от, туялар орасида ўсганман. Қўйларимиз ҳам кўп бўларди. Бия, туяларни соғишда қўлдан келганча, онамга кўмаклашардим. Отам хизмат юзасидан туманларга ишга юбориларди. Биз ҳам оиламиз билан хоҳ у туман, хоҳ бу туманга кўчиб бораверардик. Манкент қишлоғига ҳоким бўлган йиллари балоғатга етиб, оқ-қорани таниган, мустақил ҳаётга қадам қўйган даврларим эди. Бошқа тенгдошларимни билмайман, лекин менинг чорвачиликка, айниқса, отга меҳрим бошқача эди. Бўш вақт топилса, отларнинг олдига чопаверардим. Уларнинг ҳидидан завқ олардим.
Эсимда, бир куни эрта уйғондим. Дадам мени кўргач, тонг саҳарлаб қаерга отланганимни сўради. Бироз иккиланиб, астагина “Бозор”га деб жавоб бердим. Чунки ёлғиз ўзимни бегона жойларга юборишмасди.
Рухсат текккач, Қорабулоқ қишлоғидаги мол бозорига етиб келдим. Бироз у ёқ бу ёқни айлангач, отларни томоша қила бошладим. Шу вақт бир амаки келиб, “Қизим, от излаб юрибсанми?”, деб сўради. “Йўқ, фақат томоша қиляпман”, дедим. Шунда у: “Менда бир бия бор, кўрасанми?” дегач, уйига йўл олдик. Бир қулунли бияни етаклаб чиқди. Ишонасизми, мен унга “ошиқ” бўлиб қолдим. Шу куни жониворни олиб кетдим. Уни Тўнғич деб номладим. Чунки, қўлга киритган илк жониворим шу эди. Мана, 15 йилдан буён ундан қанча қулун олдим.
Яна бир воқеани айтай, бир кўпкари отини қўлга киритиш учун 6 ой қатнадим. Қорабулоқнинг Қайнар сайҳонлигида улоқ бериларди. Қайта-қайта боравердим, ахийри ўша чиройли тулпорни сотиб олдим.
Бундан тўрт йил аввал кўпкарига боргандим. Фалокат оёқ остида деганларидек, бир чеккада томоша қилиб турсак, тўда келиб қоқиб кетди. Кўзимни очсам, касалхонанинг жонлантириш бўлимида ётибман. Қўлларим гипсда, оёқ ҳам шу аҳволда. Мени кўришга танишлар, чавандозлар келишди. Шунда улар энди отнинг яқинига ҳам йўлолмаслигимни айтишди.
Даволаниб чиққан куним укамга отни эгарлашини буюрдим. Отга аста яқинлашарканман, ожиз танамни эгаллаган қўрқув қалбимдаги шижоат, йилқига бўлган меҳр-муҳаббат олдида чилпарчин бўлди. Чапдастлик билан отга мингач, кенг далаларимизни бирров айланиб келдим. Танамни яйратган тоғнинг салқин ҳавоси, она заминнинг бепоён кенгликларида тулпоримнинг гижинглаб чопиши қалбимга сурур бағишлади. Она табиатнинг мафтункорлигидан баҳра оларканман, дилимда бир ният бўй кўтарди: “Улоқ бераман!” Дуоларим ижобат бўлиб, юртга улоқ бердим. Қарияларнинг оқ фотиҳасини олдим. Улар “Қизим, сенга рухсат, олгину олдирмагин!” – дея дуо қилдилар. Шу –шу, тулпорлар ҳаётим мезонига айланди.
Отлар менга жуда қадрдон бўлиб қолган. Ишдан чарчаб келиб, кийимларимни алмаштираману, уларнинг олдига шошиламан. Таниш чеҳрани кўрганда, улар ҳам кишнаб, туёқларини ерга уриб қўйишади. Ўйнатиб турган бошларини бағримга оламан, силаб-сийпайман. Шунда бутун чарчоқларим эсдан чиқади. Анчагача улар билан гаплашаман. Ҳа, улар билан суҳбатлашаман. Уларнинг гижинглашини кўрсангиз шунда. От боққанлар билади бунинг гаштини.
Ёзда кўпкари чопадиган жониворлар “чиллага боғланади”, шу боис деярли уларнинг ёнидан кетмайман. Уларни парваришлашнинг ўзига хос жадвали бор. Тўрт тулпоримнинг кундалик рационини назорат қилиш, дорилар, ем-хашагию мева-чевасигача тақсимлаб, ўз вақтида бериш зиммамда. Лекин ҳеч нолимайман. Ёқтирган касбимдан завқ олиб ишлайман.
Аслида от жуда нозик жонивор. Бирор нарса ёқмаса, хасталаниб қолади. Уни асл ҳолига келтиргунча, тун-кун бирдек тик оёқда турасан. Вақт билан ҳисоблашмай, тиним билмайсан. Бугунги кунда етук ветеринарни учратиш қийин. Баъзида “нега мен ветеринар бўлмадим, нега бошқа соҳани танладим”, дея хаёлга бораман. Интернетдан изланиб, отларда қандай касалликлар учраши, уларни қандай даволашни ўқиб, ўргандим. Бугунги кунда олган билимларим асқотмоқда.
Яхшиям ёнимда отбеги Макенг бор. У менинг беминнат ёрдамчим. Отларимни фақат унга ишонаман. Қайси от қандай овқат ейишини, қачон дам олишини ҳам билади. Жониворларнинг кайфиятини тушунади, барини ҳисобга олади.
– Аслида Элвирадай меҳрибон қиз йўқ,– гапни илиб кетди у. – Бошқа вилоятларда ҳам эшитмаганман, хотин-қизларнинг кўпкарида юрганини. Бу соҳада элнинг не-не мард, чайир, бақувват ўғлонлари куч синашади. Элвира ҳам абжирликда улардан қолишмайди. Ёш бўлишига қарамай, улкан масъулиятни бўйнига олган. Отасига минг раҳмат! Элининг довруғини таратиб юрибди-да.
Шу пайт хонага бирин-кетин кириб келган чавандозлар билан таништирар экан, Элвирахон ғурурланиб қўйди:
– Баян билан Жасулан – менинг ишонган паҳлавонларим. Улар билан жуда фахрланаман. Неча йилдан буён бирга ишлаймиз, бир оиланинг аъзоларидай бўлиб қолганмиз. Отларимизнинг тилини ҳам шулар билади. Кўпкарида озми-кўпми ютуқларни қўлга киритиб, совринсиз қайтишмайди.
Аслида улоқда юраги бақувват, жисмонан чиниққан қорабайир зотли отлар чопади. Шундай отлар ҳам учрайдики, чопгиси келади, лекин жисмонан тайёр эмас, кўпкарининг қонун-қоидаларига тўғри келмайди. Россиядан олиб келган отларимнинг биронтаси ҳам улоққа чиқолмади. Ўзимизнинг Кўлкент, Қорабулоқ қишлоқларидан олган отларим барибир бошқача. Уларни ҳам жисмонан ҳам руҳан тайёрлаймиз.
Қирғизистон, Ўзбекистон давлатларида ўтказилган беллашувларда ҳам қатнашиб, анча ютуқларни қўлга киритдик,– деб суҳбатини якунлади у.
Суҳбатимиз тугаб, ортга қайтарканман, ҳикоямиз қаҳрамони Элвиранинг вужудидан уфуриб турган шижоат, қатъият, ишончнинг кўпчиликка ибрат бўлиши аниқ деб ўйладим. Чунки, бугунги кунда баъзи бир эркакларимизда ҳам танқис бўлиб бораётган бу хислатлар миллий қадриятларни эъзозлаб келаётган ёшгина аёлнинг ҳаёт тарзига айланиб улгурган.
Тасвирларда: Элвиранинг тулпорлари.