Икки соатга чироқ ўчиб қолди, дейлик, қандай аҳволга тушамиз? Агар кечки пайт бўлса, ёруғ дунё нақ зулматга айланади-я. Ишхоналарда ишлар таққа тўхтайди, йўлларда светофорлар ишламай, ҳаракат издан чиқади, музлатгичлар эриб, озиқ-овқат маҳсулотлари нобуд бўлади, қўйингки, бутун ҳаётий фаолиятимиз остин-устун бўлиб кетади.
Ҳа, шундай муҳим соҳа–энергетика турмушимизга шу қадар чуқур кириб олганки, усиз замонавий ҳаётни бир зум ҳам тасаввур этолмаймиз.
Эътиборингизга ҳавола этилаётган суҳбатда миллий энергия тизимини бошқарувчи пешқадам “КЕГOK” компаниясининг етакчи муҳандиси Лола Тошхўжаева (суратда) энергиянинг янги истиқболлари ва ёшларнинг бу соҳадаги ташаббуслари ҳақида ҳикоя қилади.
– Дастлаб газетхонларга ўзингизни таништириб ўтсангиз...
– Мен вилоятга таниқли энергетик Қурвонтой Тошхўжаевнинг қизиман. Отажоним Қозоғистонда хизмат кўрсатган фахрий энергетик. Ушбу соҳага 1986 йилда кириб келишимга ҳам дадам сабабчи бўлдилар.
Тошкент шаҳридаги политехника институтини “Автоматика-телемеханика” ихтисослиги бўйича тамомлаб, диплом ишимни ҳам қадрдон корхонам–“КЕГОК”да ёзганман.
– “КЕГОК” Қозоғистондаги электр тармоқларини бошқарувчи ягона миллий компания. Сиз шу ҳиссадорлик жамиятининг “Жануб” филиалида қайси вазифани бажарасиз?
– Телемеханика дегани оддий қилиб айтганда, диспетчерлар хизмати. Энергетика ва автоматика бир-бири билан узвий боғлиқ. Бутун бошли бир тизим бир хонадан тугмачалар ёрдамида бошқарилади. Шунингдек, бир хонада ўтириб, Қозоғистон жанубидаги учта вилоят: Туркистон, Жамбил, Қизилўрдадаги бошқариш тизимларидаги ахборотларга тезкор ишлов бериш, маълумотларни узатиш, кўп бўғинли тизимлардаги хатоларни аниқлаш, бартараф қилиш, хуллас бутун бошли соҳанинг назоратини юритиш мумкин. Етакчи муҳандис сифатида бажарадиган ишим шу.
– Корхонадаги замонавийлашув жараёнига тўхталсангиз.
– Корхонамиз, бутун республикадаги каби модернизация жараёнларини бошдан кечирмоқда. Янги кабеллар тортилиб, эски, ишдан чиққан трансформаторлар алмаштириляпти. Йирик станциялар: “ТЭЦ-1” “ТЭЦ-3” ва Чордарада янги қувурлар ўтказилди. Жамбил, Қизилўрдадаги йирик станцияларда ҳам янгилаш, таъмирлаш ишлари юритилмоқда. Авваллари кўп линиялар ер устида, яъни очиқ ҳолда эди, ҳозир улар ерга кўмилиб, махсус шахталардан ўтказилмоқда. Улар техник жиҳатдан мустаҳкам матоларга ўраб қўйилади. Шунингдек, авваллари электр узатгичлари мисдан бўлса, ҳозир оптик материал билан алмаштирилмоқда. Маълумот узатиш каналлари ҳам замонавийлашиб, “WI-FI” операторига уланган. Рақамлаштириш тизимига ўтганмиз, хизматлар жуда тез ва сифатли бажарилмоқда. ЕМСОS тизими орқали барча станциялардан туну-кун ахборотлар олиб, қатъий назорат қилиб турамиз. 2006 йилдаги базавий маълумотлар 2-3 баравар кўпайиб, бугунги кунда 10 миллионга етган. Уларнинг ҳар бирини назорат қилиш осон эмас, албатта.
– Ишингиз машаққатли ва ўта масъулиятли экани маълум. Бежизга осмондаги учувчидан кўра ердаги диспетчернинг иши оғир, дейилмайди. Бу соҳага бугунги кунда ёшлар келяптими?
– Жуда кўп келяпти. Бу қувончли ҳол, албатта. Айниқса, ўзбек ёшларининг олий ўқув юртларини битириб, корхонамизда ишлаётганидан мамнунман. Билимдон, ўқимишли йигит-қизларимиздан Азизбек Илашев, Мардонбек Қаюмов, Умида Абдуллаева, Тўрабек Жонибеков, Хайрулла Нишонбоевлар корхонамиз фахри. Уларга янги дастурлар билан ишлаш маъқул бўляпти. Видеоназорат ускуналарини ўрнатиш, трансформатор, кабелларни янгилаш ишларида шу ёшлар пешқадам.
– Раҳмат! Ёшларимизга устозлик қилишда ҳорманг-толманг!
Р.S. Айтганча, 2019 йил– Ёшлар йили деб эълон қилинди. “Ёшлар – юрт мадади” лойиҳаси амалга оширилмоқда. Шу ўринда давлатимиз томонидан амалга оширилаётган барча чора-тадбирлар, ислоҳотлар ёшларга доимий эътибор ва ғамхўрлик намунасидир. Ва бугунги баркамол авлодни шакллантиришга туртки ҳамдир. Албатта, эртанги кунимиз, порлоқ келажагимиз ана шу ёшлар қўлида. Бунга “КЕГОК” мисолида яна бир бор гувоҳ бўлдик.