Бундан икки йил муқаддам Алмати шаҳрида фойдаланишга топширилган кимё-биология фанларига ихтисослаштирилган “Назарбаев заковат мактаби” ўтган шанба куни ўзининг дастлабки 150 нафар битирувчиси билан охирги марта учрашиб, уларга мустақил ҳаётга йўлланма берди.

Элбошининг раҳнамолигида мамлакатимизда 20та заковат мактаби самарали фаолият юритаётани кўпчиликка аён. Тақдир тақозоси билан набирам Муроджон ҳам АҚШнинг Огайо штатида бир йил таҳсил олиб келгач, ўқишининг охирги йилини ушбу мактабда давом эттирди ва муваффақиятли тамомлади. Битирувчиларга етуклик аттестатини топшириш маросими “Астана ЭКСПО-2017” халқаро ихтисослаштирилган кўргазмасининг  очилиш куни билан бир вақтга тўғри келганлиги сабабли. жума куни йўлга чиқдик.

Таълим масканида бизни мактабнинг касб танлаш ишлари бўйича нозири Гулсина Мухтарханқизи Азимбаева  ва устозлар самимий кутиб олишди. Жойлашгач, мактаб ўқувчилари томонидан тайёрланган экспонатларни томоша қилдик. 

Белгиланган вақтда барча битирувчилар ва уларнинг ота-оналари мактабнинг мажлислар залидан жой олишди. Тадбирни мактаб директори Гулмира Мункеева очаркан, Элбошининг таълим муассасаларини ривожлантириш борасида олиб бораётган ишларига тўхталди ва заковат мактабининг кўпчилик битирувчилари мамлакатимиз ҳамда  хорижнинг нуфузли олий ўқув юртларида ўқишини грантлар асосида давом эттириш учун барча қулайликлар яратилганлигига эътибор қаратди.

Шундан сўнг Қозоғистон Республикаси Таълим ва фан вазири Ерлан Сағадиев битирувчиларнинг келгусида халқимиз, Ватанимизга ҳалол хизмат қиладиган, Элбошининг ишончини оқлайдиган етук, рақобатбардош кадрлар бўлиб етишишини тилаб, етуклик аттестатларини топширди.

Ота-оналар номидан сўзга чиққан Ибраш Бейбит мактаб жамоасига миннатдорчилик изҳор этди.