Туркистон вилоятида 1,3 миллиондан зиёд кўчат ўтқазилади.

Туркистон шаҳрини шамолдан сақлаш, табиий муҳитни яхшилаш мақсадида “Яшил белбоғ” бунёд этилаётганидан хабарингиз бор, албатта. Бу топшириқни жорий йил Давлат раҳбари мутасаддиларга тайинлаб, бу борадаги юмушларга туртки бўлди.

Режага кўра, “Яшил белбоғ” 2019-2021 йиллар оралиғида дарахт кўчатлари ўтқазиб, ўрмон ҳудудларини кенгайтиришни кўзлайди. Бу улкан иш  7700 гектар майдонда амалга оши­рилади. “Яшил белбоғ”даги юмушлар тўрт босқичда бажа­рилади. 2020 йилда илмий тадқиқот ишларига эътибор берилиб, махсус лабораторияларда ҳудуднинг табиий ша­роитлари ўрганилади. Туркистон шаҳри иқлимига мослашган дарахт кўчатлари, гуллар, буталарни етиштириш бўйича ишлар қилинади.

  Айни пайтда вилоят ҳокимлиги шаҳарда шанбалик ўтказиб, унда барча бошқарма ва департаментлар ходимлари ҳамда маҳаллий аҳоли қатнашувини таъминлади.  Шанбаликка 16та туманнинг фаоллари ҳам  жалб этилди. Одамлар вилоятнинг марказий шаҳрини ободонлаштириш мақсадида, “Яшил белбоғ” дастурининг дебочаси сифатида 24 мингдан зиёд дарахт кўчатини ўтқазишди. Тозалаш ишларига 33та техника сафарбар этилди.   

 Шуни таъкидлаш жоизки, вилоят маркази кўкаламзор­лаштириш мақсадида 16та мавзега бўлинган. Ҳар бир мавзега масъул туман ва шаҳарлар ўзларига ажратилган майдонда дарахт кўчатларини ўтқазишади.