Қарноқ қишлоқ ўзбек этномаданият бирлашмаси раиси, доимий обуначимиз, Туркистон шаҳрининг ибратли фуқароси Бекзод Ҳабибов марказ қошидаги ёшлар ва волонтёрлар етакчиси Достон Абдалиев бошчилигидаги йигит-қизлар қишлоқ ҳаётининг барча жабҳаларида фаол иштирок этишаётганини фахр билан маълум қилди. Ўзаро суҳбат чоғида у қуйидагиларни гапириб берди.

– ҚР Президенти Қ. Тўқаев ташаббуси билан жорий йил – Волонтёрлар йили деб эълон қилинганлиги боис март ойининг бошида қишлоқ маҳаллаларида, сой бўйида ҳашар йўли билан тозалаш, ободонлаштириш, кўкаламзорлаштириш ишлари олиб борилди. Дарахт кўчатлари ўтқазилди, одамлар гавжум бўладиган жамоат жойлари тозалигига алоҳида эътибор берилди.

Март ойининг иккинчи ярмида жорий этилган Фавқулодда вазият шароитида эса волонтёрлар энг олдинги сафда туриб, қишлоқ аҳолисига зарур барча амалий ёрдамни кўрсатдилар. Яъни, коронавирус тўғрисида тушунтириш ишлари олиб борилди, 5 мингдан зиёд тиббий ниқоблар тарқатилиб, дезинфекция-дорилаш, блок-постларни озиқ-овқат билан таъминлаш каби ишлар бажарилди. 

Волонтёрларимиз кўп, шу боис уларни номма-ном айтиб чиқишнинг иложи йўқ. Кўпчилик номидан уларга самимий миннатдорчилигимизни изҳор қилиб, келгуси ишларига ривож тилайман.