Мақтаарал туманига Қозоғистон уйғурлари республика этномаданият марказининг Талдиқўрғон вилоят бўлими номидан гуманитар ёрдам етиб келди. Карвондаги юк Атакентдаги махсус омборга жойлаштирилди. 

Талдиқўрғонлик гуруҳни Алмати вилоят уйғур этномаданият бирлашмасининг Талдиқўрғон шаҳридаги вакили Нурум Ивуллаев бошлаб келди. Карвонга 7 тоннага яқин 140 хил озиқ-овқат маҳсулотлари ортилган. Делегация аъзоси, уйғур этномаданият бирлашмаси фаоли Фарҳод Сабитов қийин дамларда ватандошларни қўллаб-қувватлаш – ҳар бир қозоғистонликнинг бурчи эканлигини таъкидлади.

–Бугун мақтаараллик ҳамюртларимизга Талдиқўрғондан ёрдам сифатида озиқ-овқат олиб келдик. Биз иккинчи марта келиб турибмиз. Шундай вазиятда ҳамжиҳатлигимизни кўрсатишимиз лозим. Бу сафар 250 килограмм гуруч, 100 килограмм қанд ва бошқа озиқ-овқат маҳсулотлари билан келганмиз. Юртимиз тинч, осмонимиз мусаффо бўлсин! – деди у.

Юк карвонини кутиб олган Мақтаарал туман маслаҳати котиби Қадир Сарсекбаев жетисувлик сахий инсонларга маҳаллий аҳоли номидан миннатдорчилик билдирди.