Келес тумани Бўзай қишлоқ округида яшовчи Андрей Грибанов уч болани тарбиялаётган ёлғиз ота. Турмуш ўртоғи эрта вафот этиб, бугунги кунда икки қизи ва бир ўғли билан 2015 йили иш қидириб, Сариоғоч шаҳрига кўчиб келган. Сўнг соғлиги панд бериб, қишлоққа қайтишга мажбур бўлган. Қишлоқ аҳли ижара уй сўраб келганини кўриб, ҳашар йўли билан уй қуриб беришган.

Бундан ташқари, ҳамқишлоқлари унга 20тачага яқин қўй бериб, қишлоқ ҳокимлиги уни ишга жойлаштирган. Шунингдек, бўзайликлар рўзғор техникаси, жиҳоз, идиш-товоқ, керакли кийим-кечак, озиқ-овқат маҳсулотлари билан таъминлашган. Келгусида бошпанани тўлиқ таъмирдан ўтказишмоқчи. Бошпанага эга бўлган Андрей Петрович ҳамқишлоқларига миннатдорчилик билдирди.

Келес туманига матбуот сафари доирасида журналистлар маҳаллий фуқароларни иш билан таъминлаётган қурилиш майдонларига бордилар. Улардан бири “Бандлик-2020” йўл харитаси доирасида республика бюджети ҳисобидан тўкис таъмирдан ўтаётган Биртилак қишлоқ округидаги 13-сонли Т. Бигелдинов номли мактабидир. Қурилиш ишларига қишлоқнинг 40га яқин аҳолиси жалб этилган. Жорий йилнинг август ойида мактабни фойдаланишга бериш режаланган. 

Дастур доирасида Келес туманида жами 3та иншоотда қурилиш ишлари олиб борилмоқда. 

Булар: Т. Бигелдинов номли мактаб, Ушқин қишлоқ окургидаги спорт майдончаси ва Ақтўбе қишлоқ округидаги касалхонадир.