Кентов шаҳридаги тажрибали мутахассис, доимий жамоатчи обуначимиз  Каримжон Ғайбишев асос солиб, узоқ йиллар самарали раҳбарлик қилган, Қозоғистон Республикасида шу соҳада энг илғор ташкилот даражасига кўтарган «Ясси-несие» МЧБга янги раҳбар тайинлангани ҳақида газетамизда хабар берган эдик. Шу кунларда Каримжон ака нафақа ёшига тўлиши муносабати билан ҳамкасблари уни ҳурмат-эҳтиром билан фахрий ҳордиққа кузатишди. «Ясси-несие»нинг янги раҳбари ушбу ташкилотда узоқ йиллар Каримжон ака билан ҳамкорликда меҳнат қилган Алишер Йўлдошевдир.

А. Йўлдошев(тасвирда) 1982 йили июнь ойида Қарноқ қишлоғида таваллуд топган. М. Қошғарий номли ўрта мактабни тамомлагач, А. Яссавий номидаги Халқаро қозоқ-турк университетида жаҳон иқтисодиёти ихтисоси бўйича олий маълумот олди. Меҳнат фаолиятини «Ясси-несие» МЧБ-да бухгалтер-кассир бўлиб бошлаган. Шу ташкилотда 2010-2019 йилларда ҳуқуқшунос, сўнгра «Ясси-несие» МЧБ насия биродарлиги бошқаруви раисининг ўринбосари, 2020 йилнинг 3 июлидан эса ушбу ташкилот, яъни «Ясси-несие» МЧБ насия биродарлиги бошқаруви раиси лавозимида самарали меҳнат қилиб келмоқда. 

У умр йўлдоши Элноза Ҳусан қизи билан тўрт нафар ўғил-қиз тарбиялаб, вояга етказмоқда.   

Давлатимиз қишлоқ хўжалиги тараққиёти, хусусан, тадбиркорликни ривожлантириш, янги иш ўринларини барпо этиш борасидаги сиёсатини амалга ошираётган «Ясси-несие» МЧБ ўтган йиллар мобайнида Кентов шаҳри, бошқа ҳудудлар,  хусусан, Қарноқнинг иқтисодий тараққиётига катта ҳисса қўшганлигини фахр билан эътироф этамиз. 

«Ясси-несие» МЧБ жамоасига эса янги, ёш раҳбар Алишер Йўлдошев бошчилигида масъулиятли меҳнатда муваффақиятлар ҳамроҳ бўлишини тилаб қоламиз.