Мен, Туркистон шаҳри Чўрноқ қишлоқ округига қарашли Дилором Бегматова раҳбарлик қилаётган «Қизиласкар» ўрта мактабини аълога тамомлаб, устозларим, хусусан, синф раҳбарим Дилдор Исоқовадан олган билимларимни амалда қўллаб, Қарағанди давлат университетига «Фармацевтика технологияси» мутахассислиги бўйича давлат гранти асосида ўқишга кирдим. Билим берган қадрдон устозларимга, шароит яратиб берган ота-онамга ташаккурим чексиз. Олий ўқув юртида аъло ўқиш биз учун улкан масъулият. Элбошимиз Н. Назарбаев ёш авлоднинг олий маълумот олиши учун яратиб берган имкониятларидан биз, ёшлар беҳад хурсандмиз. Мана, кўп йиллар давомида айтилиб келган лотин алифбосига кўчиш йўлида амалий ҳаракатлар бошланди. Мен, фармацевтика мутахассиси сифатида келажакда лотин алифбосида кўпроқ ишлашимизни эътиборга олиб, бу қарор жуда муҳим ҳамда жамият учун зарур деб ҳисоблайман. 

Айни пайтда ёзги таътил ва амалиёт тажрибасидан қишлоғимиздаги республикага машҳур мебель ишлаб чиқарадиган бобомиз Тиловберган Худойберганов асос солган корхонада ўтмоқдаман. Барчага баркамоллик ҳамроҳ бўлсин!