Туркистон шаҳрида “Ҳаёт” ва “Шифо” лойиҳалари яна бир бор амалга оширилди. Nur Otan партияси Туркистон вилоят бўлимининг пандемияга қарши лойиҳалари доирасида касалхоналарга 31та сунъий респиратор ва 200дан зиёд дори-дармон жамламаси юборилди.

Бунга қадар “Ҳаёт” лойиҳаси бўйича 21та ускуна касалхоналарга етказилган бўлса, 400 оилага “Шифо” орқали дори-дармон тарқатилган эди. Яъни партия ёрдамида сунъий нафас олиш ускуналари сони 52тага етди.

Партия филиалида ўтган мажлисда филиал раисининг биринчи ўринбосари Б. Тажибаев пандемияга қарши кураш мақсадида “Биз биргамиз!” акциясини бошлагани, вилоятдаги 43 мингдан зиёд оилага озиқ-овқат, 34055 оилага 50 минг тенгедан пул берилганини маълум қилди.

Яқин келажакда яна 4852 оилага 50 минг тенгедан бериш режалаштирилмоқда.

“Вилоят маслаҳати депутатлари, партия аъзолари ва бошқа тадбиркорлар ёрдамида “Ҳаёт” лойиҳаси асосида 52та сунъий нафас олиш ускунаси сотиб олинди. Бундан ташқари, кам таъминланган 600 оилага “Шифо” лойиҳаси доирасида дори воситалари тарқатилди. Биз мамлакатнинг фаол фуқаролари, тадбиркорларга, “Jаs Оtаn” ёшлар қаноти, ”Jas Turkistan” кўнгиллилар клубидан бениҳоя миннатдормиз”, деди Б. Тажибаев.